Nyuma yo kotswa igitutu, u Burundi bwarekuye umunyamakuru w’umunyarwanda

Chief Editor | 25-08-2016
Nyuma yo kotswa igitutu, u Burundi bwarekuye umunyamakuru w’umunyarwanda

Gisa Steve Irakoze, umunyamakuru w’umunyarwanda ukorera Radio Buja FM y’ i Bujumbura mu Burundi, yarekuwe na Polisi y’iki gihugu nyuma y’uko yari yatawe muri yombi n’inzego zishinzwe iperereza ku mugoroba wo kuwa Kane tariki 18 Kanama 2016, u Burundi bukotswa igitutu ngo bumurekure bidatinze.

Kuri uyu wa Kane tariki 25 Kanama 2016, mu masaha ya mu gitondo nibwo Gisa Steve Irakoze yarekuwe n’inzego zishinzwe umutekano mu Burundi, nyuma y’igihe botswa igitutu n’abantu benshi barimo umuryango w’Abanyamakuru batagira umupaka na zimwe mu mpirimbanyi z’uburenganzira bw’ikiremwamuntu mu Burundi no ku rwego mpuzamahanga.

Gisa Steve Irakoze, ni umunyamakuru wakoreye ibitangazamakuru byo mu Rwanda nka Radio Flash FM na Radio Salus, ubu akaba akorera Radio Buja FM yo mu mujyi wa Bujumbura mu Burundi.

Ni umusore w’umunyarwanda wanarangije muri Kaminuza y’u Rwanda i Huye, ariko yari afite umuryango no mu gihugu cy’u Burundi, naho akaba yakundaga kuhaba cyane na mbere y’uko atangira gukorera Radio Buja FM, cyane ko bivugwa ko nyina yaba ari umurundikazi naho se akaba umunyarwanda.

KANDA HANO UREBE VIDEOS UTASANGA AHANDI