Paris: Byakomeye kubera umwogoshi wa Perezida uhembwa hafi 9.000.000 ku kwezi

Chief Editor | 14-07-2016
Paris: Byakomeye kubera umwogoshi wa Perezida uhembwa hafi 9.000.000 ku kwezi

Nyuma y’uko bimenyekanye ko umwogoshi wa Perezida Francois Hollande w’u Bufaransa ahembwa akayabo k’amayero 9.895, abantu benshi bakomeje kubyinuba ndetse uko amasaha ashira biragenda birushaho gufata indi ntera aho usanga byabaye ikibazo gikomeye.

Ikinyamakuru cyo mu Bufaransa kitwa Le Canard Enchaîné nicyo cyahishuye bwa mbere ko umwogoshi wa Perezida Francois Hollande afite amasezerano y’akazi amwemerera guhabwa umushahara w’amayero 9.895 buri kwezi, ni ukuvuga hafi 9.000.000 uyabaze mu mafaranga y’u Rwanda. Ibi byatunguye benshi ubwo byacicikanaga mu binyamakuru no ku mbuga nkoranyambaga guhera kuri uyu wa Gatatu.

Umuvugizi wa Guverinoma y’u Bufaransa, Stephane Le Foll nawe yemeje aya makuru, ashimangira ko umushahara w’uyu mwogoshi wa Perezida Francois Hollande witwa Olivier B koko ari akayabo k’amayero 9.895 buri kwezi. Yisobanuye avuga ko uyu mwogoshi yataye salo ye, kandi akaba akora akazi ko kwita ku misatsi ya Perezida amasaha 24 ku yandi.

Uretse uyu mushahara kandi, Olivier B anagenerwa inzu yo kubamo we n’umuryango we, hakiyongeraho n’ibindi byangombwa by’ibanze bigenerwa umuryango we. Umuvugizi wa Guverinoma avuga ko nta wundi agira basimburanwa ku kazi, kuburyo n’umugore we yabyaraga adahari.

Uyu mwogoshi yatangiye akazi ubwo Perezida Francois Hollande yari agiye ku butegetsi, kandi kuva icyo gihe aramuherekeza mu ngendo ze zose, aho agenda amusokoza anatunganya imisatsi ye mbere yo kujya mu birori cyangwa ahandi mu ruhame. Afite amasezerano y’akazi amutegeka kugira ibanga haba mu gihe akiri kuri aka kazi, ndetse na nyuma amasezerano arangiye akaba atemerewe kumena amabanga y’ibyo azi cyangwa abona kuri Perezida dore ko bahorana.

Umwe mu bagaragaje ko bababajwe cyane n’uyu mushahara, ni Sébastien Huyghe, umuvugizi w’ishyaka rya Nicolas Sarkozy wahoze ayobora u Bufaransa. Avuga ko imyitwarire ya Perezida Hollande ku bijyanye n’imisatsi, igaragaza ko ari umuntu wayobye.

Ishyaka rya Perezida Hollande naryo ryagaragaje ko ritishimiye ibi na gato, dore ko gusesagura amafaranga y’igihugu bimaze igihe ari umwe mu migayo ishyirwa kuri Perezida. Abandi bayobozi bakomeye muri iki gihugu, nabo bagaragaza ko harimo kurengera kuko imisatsi ya Perezida nta kidasanzwe kiyirimo cyatuma itangwaho aka kayabo.

KANDA HANO UREBE VIDEOS UTASANGA AHANDI