Perezida Kim Jong-un wishe nyirarume amurishije imbwa 120 yakoze ikindi gikorwa cy’ubugome

Chief Editor | 30-08-2016
Perezida Kim Jong-un wishe nyirarume amurishije imbwa 120 yakoze ikindi gikorwa cy’ubugome

Perezida Kim Jong-un, umuyobozi wiyita uw’Ikirenga w’igihugu cya Koreya y’Amajyaruguru ukunze kurangwa n’ibikorwa by’ubugome no kutababarira, yakoze ikindi gikorwa kigaragaza ubushinyaguzi n’ubugome, iki kikaba kije nyuma y’ibindi bikorwa byinshi by’ubugome yakoze birimo n’igihano yahaye nyirarume cyo kumwica akoresheje kumuha imbwa 120 zikamurya mu ruhame kugeza zimumaze.

Kim Jong-un usanzwe uzwiho kutagira imikino mu miyoborere ye, yategetse ko abayobozi babiri bakuru mu gihugu cye bicwa hakoreshejwe ibitwaro bya rutura bisanzwe bikoreshwa mu kurasa indege z’intambara, akaba yategetse ko bicwa muri ubu buryo kugirango hatagira agace na kamwe k’umubiri wabo kagaragara nyuma yo kwicwa.

Ri Yong Jin, umwe mu bayobozi ba Minisiteri y’Uburezi muri Koreya ya ruguru, yakatiwe na Perezida Kim Jong-un igihano cy’urupfu azira gusa kuba yarasinziriye mu nama yari iyobowe n’uyu mukuru w’igihugu utegekesha igitugu nawe ubwe yiyemerera.

Undi ni Hwang Min wari Minisitiri w’Ubuhinzi muri Koreya ya ruguru, uyu we akaba yarakatiwe urwo gupfa azira kuba yarashyizeho uburyo bwo kongera umusaruro mu buhinzi, ubutegetsi bwa Kim bukaza kubifata nko gupfobya imiyoborere na politiki y’ubuhinzi isanzwe iriho muri iki gihugu.

Mu kigo cya gisirikare cy’ahitwa Pyongyang, niho aba bombi barasiwe hakoreshejwe imbunda za rutura zikoreshwa mu guhanura indege cyangwa guhagarika ibindi bitero bikorwa hakoreshejwe indege za gisirikare.

JPEG - 70.6 kb

Perezida Kim Jong-Un w’imyaka 32 gusa y’amavuko, ni umugome wo ku rwego rwo hejuru

Ikinyamakuru Daily Mail kivuga ko n’ubwo akenshi bidatangazwa kubera ubwoba, hari ibikorwa byinshi by’ubugome bikorwa muri Koreya ya ruguru ariko bimwe bikorwa ku mugaragaro. Jang Song Thaek wari nyirarume wa Perezida Kim, yishwe hakoreshejwe imbwa zamuriye mu ruhame rubanda bareba, azira kwigwizaho imitungo. Hyun Yong Chol wari Minisitiri w’Ingabo nawe yishwe umwaka ushize azira gushaka kugambanira Perezida Kim, kandi uyu nawe yarashwe hakoreshejwe igitwaro cya rutura.

Mu kwezi k’Ugushingo 2015, abagabo bo muri Koreya ya ruguru bategetswe ko bose bagomba kwiyogoshesha nka Perezida Kim Jong-Un naho abagore bose bakiyogoshesha nk’umugore wa Perezida witwa Ri Sol-ju. Ibi byahise byubahirizwa bwangu ngo hatagira uwicwa.

KANDA HANO UREBE VIDEOS UTASANGA AHANDI