Perezida Mugabe yatanze imbabazi ku bagororwa kubera ikibazo cy’inzara

Chief Editor | 27-05-2016
Perezida Mugabe yatanze imbabazi ku bagororwa kubera ikibazo cy’inzara

Nk’uko bigaragara mu Iteka rya Perezida Robert Mugabe wa Zimbabwe ryasohotse mu igazeti ya Leta No 36, uyu mukuru w’igihugu yababariye abagore benshi bari imfungwa hatitawe ku byaha bari bafungiwe, gusa abari barakatiwe urwo gupfa cyangwa gufungwa burundu bo ntibari mu bahawe imbabazi.

Mu mfungwa zarekuwe, harimo abari barakatiwe imyaka myinshi y’igifungo kubera ibyaha nk’ubujura, ubwicanyi, gucuruza magendu n’ibindi, aba bose umugore wari warakatiwe gufungwa imyaka iyo ari yo yose itari igifungo cya burundu akaba yahise afungurwa aritahira.

Umugore w’imyaka 25 witwa Mosline Chakamufuna, ni umwe mu bababariwe nyuma y’ibyumweru bibiri akatiwe gufungwa imyaka 10 azira kwica umwana yibyariye. Undi witwa Adlaidy Murombo w’imyaka 21 we yari amaze imyaka 2 muri gereza atangiye igifungo cy’imyaka 10 yakatiwe azira gushaka kwica nyirarume, dore ko yamutwikishije ipasi ishushye mu maso, aba bose bakaba bafunguwe n’imbabazi za Perezida Mugabe.

Umuvugizi w’ikigo gishinzwe imirimo y’imfungwa n’abagororwa muri Zimbabwe, habwiye ikinyamakuru Newsday ko abagore bagomba gufungurwa barenga 2000.

Uretse abagore ariko, Perezida Mugabe yanababariye ab’igitsina gabo bari munsi y’imyaka 18 y’amavuko ndetse n’abarengeje imyaka 60 ariko bakaba baramaze gukora bibiri bya gatatu by’igihe bakatiwe kumara muri gereza. Muri aba bagabo kandi, ntabwo harimo abasanzwe bafungiwe ibyaha byo kwica, gufata abagore cyangwa abana ku ngufu, ubujura bwitwaje intwaro no kugambanira igihugu.

Ibinyamakuru bitandukanye muri Zimbabwe bivuga ko imbabazi za Perezida Mugabe zatanzwe kubera umubare wari mu magereza uruta kure ubushobozi yagenewe kwakira, uretse n’ibyo ikibazo cyo kubabonera ibibatunga kikaba cyari ingorane kuri Leta.

KANDA HANO UREBE VIDEOS UTASANGA AHANDI