Perezida Museveni yarakaje intumwa za Amerika, u Burayi na Canada zirikubita n’umujinya zirasohoka

Chief Editor | 13-05-2016
Perezida Museveni yarakaje intumwa za Amerika, u Burayi na Canada zirikubita n’umujinya zirasohoka

Itsinda ry’abadipolomate b’i Burayi, Canada na Leta Zunze Ubumwe za Amerika bari bitabiriye ibirori byo kurahira kwa Perezida Yoweri Museveni wa Uganda kuri uyu wa Kane tariki 12 Gicurasi 2016, barikubise n’uburakari basohoka mu birori bitarangiye, nk’ikimenyetso cy’umujinya batewe na Museveni.

Intumwa z’abadipolomate bo muri Leta Zunze Ubumwe za Amerika, Ubumwe bw’ibihugu by’u Burayi na Canada, bahagurukijwe mu birori by’irahira rya Perezida Museveni no kumva uyu mugabo umaze imyaka 30 ayobora Uganda, anenga akanatesha agaciro urukiko mpuzamahanga mpanabyaha (ICC).

Imbere y’abanyacyubahiro benshi barimo abakuru b’ibihugu byo muri Afrika nka Chad, Ethiopia, Kenya, Somalia, Afrika y’Epfo, Sudan, Tanzania na Zimbabwe, Perezida Museveni yavuze ko urukiko mpuzamahanga mpanabyaha (ICC), ari itsinda ry’abantu batagize icyo bamaze, ndetse aboneraho kuvuga ko atarushyigikiye na gato. Abari bahagaririye ibihugu bivuga rikijyana mu mikorere y’uru rukiko, bumvise ko Museveni arimo kubajomba ibikwasi bahita bisohokera n’umujinya.

Intumwa ya Leta Zunze Ubumwe za Amerika yari yitabiriye uyu muhango, yatangarije BBC ko uretse amagambo Museveni yavuze akabatera umujinya n’uburakari, batishimiye na gato kubona Perezida wa Sudan, Omar al-Bashir witabiriye ibi birori mu gihe hari impapuro zo kumuta muri yombi zashyizwe hanze n’urukiko mpuzamahanga mpanabyaha, rumushinja ibyaha bya Jenoside yakoreye mu gace k’intara ya Darfur.

KANDA HANO UREBE VIDEOS UTASANGA AHANDI