Perezida Museveni yazamuye umuhungu we mu ntera, amuha ipeti rya General Major

Chief Editor | 17-05-2016
Perezida Museveni yazamuye umuhungu we mu ntera, amuha ipeti rya General Major

Kuri uyu wa Mbere tariki 16 Gicurasi 2016, Perezida wa Uganda, Yoweri Kaguta Museveni, yazamuye mu ntera abasirikare bakuru abongerera amapeti, muri abo hakaba harimo n’umuhungu we Muhoozi Kainerugaba, uyu akaba yahawe ipeti rya Major General.

Major General Muhoozi asanzwe ari komanda w’ingabo zicunga umutekano wa Perezida Museveni, iz’umuryango we ndetse n’izindi nzego nkuru z’ubuyobozi bw’igihugu cya Uganda, bivuga ko umutekano wa Perezida Museveni ucungirwa hafi n’ingabo ziyobowe n’umwana we.

Mu bandi bazamuriwe amapeti, harimo Major General Joram Mugume wahawe ipeti rya Lieutenant General, Colonel Charles Lutaaya wahawe ipeti rya Brigadier General, Colonel Stephen Muzeyi Sabiti wahaye ipeti rya Brigadier General, ndetse na Col James B Mugabe nawe wagizwe Brigadier General.

JPEG - 65.6 kb

Uyu Major General Muhoozi yavukiye muri Tanzania tariki 24 Mata 1974, mbere y’uko Museveni aba Perezida wa Uganda kuko yicaye mu ntebe y’ubuyobozi mu 1986. Muhoozi yize amashuri ye muri Tanzania, Kenya na Suwedi, hanyuma Se amaze kuba Perezida ahita akomereza muri Uganda aho yarangije amashuri yisumbuye mu 1994.

Mu mwaka w’1994, yahise atangira imyitozo ya gisirikare, aza gukomeza kwiga amashuri asanzwe mu 1996 kugeza mu 1998 aho yigaga muri Kaminuza ya Nottingham, ariko icyo gihe ntiyari yanditswe byemewe mu ngabo z’igisirikare cya Uganda. Mu 1999 yakoze ubukwe, ahita atangira amasomo ajyanye n’ibya gisirikare nk’umusirikare wa Uganda byeruye, akaba yarahereye muri Royal Military Academy Sandhurst. Mu 2000, Muhoozi yahise ajya kwiga mu ishuri rya gisirikare ryo mu Misiri, aho yize ibijyanye no kuyobora abandi basirikare.

Muri 2007 yagiye kwiga mu ishuri rya gisirikare rya Leta Zunze Ubumwe za Amerika, arangiza amasomo ye muri 2008. Yize kandi ibijyanye no gucunga umutekano w’igihugu mu ishuri rya gisirikare muri Afurika y’Epfo. Ni umwe mu basirikare ba Uganda bubahwa cyane, dore ko ari n’umuhungu wa Perezida.

KANDA HANO UREBE VIDEOS UTASANGA AHANDI