Perezida Obama yanze kubonana na Perezida wa Philippines wamututse kuri nyina

Chief Editor | 7-09-2016
Perezida Obama yanze kubonana na Perezida wa Philippines wamututse kuri nyina

Perezida Barack Obama wa Leta Zunze Ubumwe za Amerika, yahagaritse umubonano we wa mbere na Perezida wa Philippines, Rodrigo Duterte, nyuma y’amasaha macye uyu mukuru w’igihugu umaze igihe gito ku butegetsi, yibasiye Obama akamutuka kuri nyina akamwandagaza.

Nk’uko byemezwa n’ibiro ntaramakuru by’Abafaransa AFP, Perezida Rodrigo Duterte yatutse Barack Obama amwita umuhungu wabyawe n’indaya, uyu muyobozi akaba yarise nyina wa Obama indaya ubwo yamwihanangirizaga avuga ko Perezida wa Amerika atari we ukwiye kumuha amabwiriza ku bijyanye n’iyubahirizwa ry’uburenganzira bwa muntu mu gihugu cye.

JPEG -

Perezida Rodrigo Duterte yibasiye bikomeye Perezida Barack Obama

Rodrigo Duterte yibasiye Obama, mbere gato y’inama bagombaga guhuriramo yiga ku kibazo cy’ibiyobyabwenge byugarije Philippines, bikaba bimaze gutuma abantu basaga 2,400 bapfa mu mezi abiri ashize. Byari biteganyijwe ko Obama azahata ibibazo uyu mukuru w’igihugu cya Philippines ku bijyanye n’iki kibazo.

Rodrigo Duterte, aganira n’abanyamakuru kuwa Mbere ubwo yari agiye kurira indege agana i Laos ahagombaga kubera iyi nama, yagize ati: "Obama wowe ugomba kwiyubaha, ntuzigere unzanaho ibibazo cyangwa amategeko. Wowe mwana w’indaya, nzakuvuma muri iriya nama. Tuzivuruguta mu byondo nk’ingurube nuramuka ubinzanyeho."

Ibi ariko, kuri uyu wa Kabiri Perezida Rodrigo Duterte yatangaje ko abyicuza, avuga ko yabitewe no guhatwa ibibazo bikomeye n’abanyamakuru baganiraga, asaba imbabazi kuba yaribasiye mugenzi we uyobora igihugu cya Leta Zunze Ubumwe za Amerika.

Rodrigo Duterte na Obama bagombaga guhurira mu nama yateguwe n’Umuryango w’Ubumwe bw’ibihugu bya Aziya y’Amajyepfo, inama byari biteganyijwe ko bahuriramo mu mujyi wa Vientiane, umurwa mukuru w’igihugu cya Laos kiri ku mugabane wa Aziya. Gusa byaje kurangira, ibitutsi bya Rodrigo Duterte bitumye Perezidansi ya Leta Zunze Ubumwe za Amerika yanzura ko Obama adashobora kuyitabira.

JPEG - 31.1 kb

Perezida Obama yababajwe n’agasuzuguro ndetse n’ibitutsi bwa Rodrigo Duterte

Rodrigo Duterte w’imyaka 71 y’amavuko, yatorewe kuyobora Philippines muri Gicurasi uyu mwaka, aho yagiye ku butegetsi yizeza abaturage gukemura ikibazo cy’ibiyobyabwenge kibasiye iki gihugu.

Kuva yatangira akazi nyuma yo kurahirira kuyobora iki gihugu tariki 30 Kamena 2016, muri ayo mezi abiri gusa abantu basaga 2,400 bamaze kwicwa mu bikorwa n’imikwabu Polisi ikora irwanya abakora n’abacuruza ibiyobyabwenge.

Mu nama iherutse kubera mu mujyi wa Hangzhou mu Bushinwa yahuje ibihugu bya G20, Perezida Obama yari yagaragaje ko igihugu cye gihangayikishijwe n’ikibazo cy’ibiyobyabwenge muri Philippines, kandi akaba yiteguye kuzagira icyo abivugaho byeruye muri iyi nama yagombaga guhuriramo na Perezida Rodrigo Duterte.

Perezida Rodrigo Duterte we ntakozwa ibyo anengwa na Kikiziya Gaturika, imiryango iharanira uburenganzira bwa muntu n’Umuryango w’Abibumbye, bamunenga kuba arwanya ibiyobyabwenge yica abantu, nyamara we yahamije ko abantu bazakomeza bagapfa.

Mu kiganiro n’abanyamakuru Kuwa Mbere, Rodrigo Duterte yagize ati: "N’abandi bantu benshi bazicwa, bazicwa cyane kugeza igihe ibiyobyabwenge bizashira burundu. Bacicwa rwose kugeza igihe umuntu wa nyuma mu bakora ibiyobyabwenge nawe azapfa, tuzakomeza tubice."

JPEG - 46.9 kb

Uyu mukuru w’igihugu cya Philippines avuga ko n’abandi bantu benshi bazakomeza bakicwa

Rodrigo Duterte yavuze ko nta mategeko n’amabwiriza ya Leta Zunze Ubumwe za Amerika azumva, n’ubwo iki gihugu cyahoze kibakoroniza. Gusa uburyo bwo kurwanya ibiyobyabwenge muri Philippines bukoreshwa Polisi yica abantu, bwakomeje kugawa cyane n’abayobozi batandukanye ku isi.

KANDA HANO UREBE VIDEOS UTASANGA AHANDI