Perezida Obama yibasiye bikomeye Donald Trump, ashimagiza Hillary Clinton

Chief Editor | 28-07-2016
Perezida Obama yibasiye bikomeye Donald Trump, ashimagiza Hillary Clinton

Barack Obama, Perezida wa Leta Zunze Ubumwe za Amerika ugomba gusimburwa kuri uyu mwanya mu mpera z’uyu mwaka, yibasiye cyane Donald Trump uri mu bahatanira kumusimbura, hanyuma ashimagiza Hillary Clinton amwerekana nk’umugore w’igitangaza.

Mu nama y’abo mu ishyaka ry’Abademokarate bahagarariwe mu matora ya Perezida na Hillary Clinton, Perezida Barack Obama yavuze ko ashishikajwe cyane n’ahazaza ha Leta Zunze Ubumwe za Amerika, bityo akaba agomba kwifuriza iki gihugu ibyiza birimo n’umuyobozi ushoboye uzamusimbura.

Aha niho Barack Obama yahereye avuga ko Donald Trump ari umuntu udakenewe na mba ngo iki gihugu kibe igihangange, kuko ngo ari umugabo utagira imigambi mizima kandi akaba nta bintu bifatika ashobora kwereka abanyamerika. Obama yagaragaje ko Amerika yaba igize akaga iramutse iyobowe na Donald Trump.

Ku rundi ruhande ariko, Barack Obama ugaragaza ko ashyigikiye cyane Hillary Clinton, yamushimagije cyane yerekana ko yifuza kubona uyu mugore akora amateka yo kuba umugore wa mbere uyoboye Leta Zunze Ubumwe za Amerika.

Obama ati: "Nta muntu n’umwe nigeze mbona ufite ubuhangange bwo kuba Perezida wa Leta Zunze Ubumwe za Amerika nka Hillary Clinton. Nta mugabo cyangwa umugore wagera ku rwego rwe, n’ubwo hari abashaka kumuca intege ntajya yemera gutsindwa."

Perezida Barack Obama kandi yatunguye abantu, ubwo yavugaga ko nawe ubwe nk’umuntu umaze imyaka 10 ayobora Leta Zunze Ubumwe za Amerika, asanga atabasha kwigeza ku rwego rwa Hillary Clinton. Anavuga kandi ko n’umugabo wa Hillary Clinton uzwi nka Bill Clinton, n’ubwo nawe yigeze kuyobora Amerika, atarusha ubuhangange uyu mugore we.

KANDA HANO UREBE VIDEOS UTASANGA AHANDI