Pierre Nkurunziza ngo ni umwere nka Habyarimana, Kaddafi, Saddam na Bashar Al-Assad

Chief Editor | 18-08-2016
Pierre Nkurunziza ngo ni umwere nka Habyarimana, Kaddafi, Saddam na Bashar Al-Assad

Ubutegetsi bwa Perezida Pierre Nkurunziza mu gihugu cy’u Burundi, bugaragaza ko ari ubutegetsi bwiza kandi bushingiye ku mahame ya demokarasi n’ubwisanzure, ibyo bushinjwa bikaba ari ibinyoma nk’ibyashinywe Perezida Juvenal Habyarimana w’u Rwanda, Muammar Gaddafi muri Libya, Saddam Hussein muri Irak na Bashar Al-Assad muri Syria.

Ishyaka riri ku butegetsi mu Burundi CNDD-FDD, ibi ryabigaragaje mu itangazo ryashyize hanze kuwa Kabiri ryamagana bimwe mu bihugu rivuga ko abayobozi babyo babeshya ko mu Burundi hakorwa ubwicanyi bw’iyicarubozo, kuba hari abafatwa bagafungwa bazira ubusa kubera impamvu za politiki, kuba hari abanyerezwa, kuba Imbonerakure za CNDD-FDD zifata abagore n’abakobwa ku ngufu n’ibindi bibi birimo n’itegurwa rya Jenoside, nyamara ubutegetsi bw’u Burundi bwo ngo buyoboye neza abaturage mu bwisanzure no muri demokarasi

Bavuga ko ubutegetsi bw’u Rwanda ku gihe cya Perezida Juvenal Habyarimana bwabeshyewe ko bwavuze ko impunzi zitazakirwa kuko igihugu cyuzuye bakabiheraho bamuhirika, muri Irak naho Saddam Hussein akaba yarabeshyewe ko yari atunze ibitwaro bya kirimbuzi kugeza yishwe, Muammar Gaddafi muri Libya nawe akaba yarashinjwe gushaka kurimbura abaturage be kugeza bamuhitanye naho muri Syria ho Perezida Bashar Al-Assad akaba yarabeshyewe guhohotera uburenganzira bwa muntu, nk’uko n’ubutegetsi bw’u Burundi burangajwe imbere na Pierre Nkurunziza n’ishyaka rya CNDD-FDD babeshyerwa ibyaha byinshi bitandukanye.

N’ubwo Perezida Juvenal Habyarimana, Saddam Hussein, Kaddafi na Bashar Al-Assad bazwi mu ruhando mpuzamahanga nk’abakuru b’ibihugu babaye abanyagitugu, ishyaka riri ku butegetsi mu Burundi riterwa ishame no kwerekana ko Perezida Pierre Nkurunziza w’u Burundi arengana nkabo, akabeshyerwa ibibi adakora.

Iri tangazo rya CNDD - FDD ryasomewe kuri Radio na televiziyo y’igihugu, ryanasakajwe ahantu hatandukanye ku mbuga za internet no ku mbuga nkoranyambaga z’iri shyaka, ryibasira cyane Umuryango w’Abibumbye kimwe n’ibihugu cyangwa abantu ku giti cyabo bagiye banenga ubutegetsi bwo mu Burundi n’ibikorwa by’ubwicanyi bidasiba kuhabera.

SOMA IRI TANGAZO RYOSE KURI FACEBOOK YA CNDD-FDD HANO:

KANDA HANO UREBE VIDEOS UTASANGA AHANDI