RDC: Iby’amatora byabaye amayobera, hemezwa ko Kabila azakomeza kuyobora ku ngufu

Chief Editor | 12-05-2016
RDC: Iby’amatora byabaye amayobera, hemezwa ko Kabila azakomeza kuyobora ku ngufu

Mu gihe Perezida Joseph Kabila wa Repubulika Iharanira Demokarasi ya Kongo yenda kurangiza manda ebyeri yemererwa n’itegeko nshinga, urukiko rukuru muri iki gihugu kuri uyu wa Gatatu rwemeje ko ashobora gukomeza kuyobora iki gihugu hatabayeb amatora, gusa abatavuga rumwe n’ubutegetsi bwe ibi babyamaganiye kure.

Hakurikijwe ibiri mu Itegeko Nshinga rya Repubulika Iharanira Demokarasi ya Kongo, tariki 19 Ukuboza 2016 nibwo Joseph Kabila azaba arangije manda ze ebyeri, bivuga ko guhera tariki 20 Ukuboza 2016, atari asanzwe yemerewe kuba yakwicara mu ntebe y’umukuru w’iki gihugu.

Bisanzwe biteganyijwe ko mu gihe Joseph Kabila yaramuka akomeje kuyobora nyuma y’iyo tariki yavuzwe haruguru, byafatwa nk’ubutegetsi bw’igitugu bwabayeho hirengagijwe ibiteganywa n’Itegeko Nshinga. Nyamara ibi byamaze kwemezwa n’urukiko rw’ikirenga, ruca amarenga ko amatora yari ateganyijwe muri iki gihugu ashobora kuburizwamo, Perezida Kabila agakomeza kuyobora iki gihugu atabitorewe.

Urukiko rukuru muri iki gihugu, rwavuze ko mu gihe amatora yaramuka atabaye, nta kabuza Joseph Kabila yakwemererwa gukomeza kuyobora igihugu, nyamara abatavuga rumwe n’ubutegetsi ntibumva uburyo hatekerezwa ku cyaba amatora atabaye, bakabura gutekereza icyakorwa ngo ayo matora abe kandi mu gihe gikwiye.

KANDA HANO UREBE VIDEOS UTASANGA AHANDI