Trump yagaragaje impamvu Hillary Clinton adakwiye kuba Perezida wa Amerika

Bikorimana Alexis | 27-09-2016
Trump yagaragaje impamvu Hillary Clinton adakwiye kuba Perezida wa Amerika

Mu biganoro mpaka byahuje aba bakandida bombi, Donald Trump yagaragaje ko Clinton nta bubasha ndetse n’ubushobozi afite byo kuyobora igihugu cy’igihangange nka Leta Zunze Ubumwe za Amerika, uyu mukandida wo mu ishyaka ry’abarepubulika akaba yanongeyeho ko Clinton afite indwara zitatuma akoresha imbaraga nyinshi mu kwitangira igihugu.

Mu guca intege no kwerekana ko umukandida bahanganiye umwanya w’umukuru w’igihugu atabikwiye, Umunyemari wo mu ishyaka ry’abarepubulika yakunze kugaragaza ko adahisha akari ku mutima. Kuri uyu wa Kabiri, yavuze ko abona uwo bahanganye nta bushobozi namba amubonana bwo guhangana n’ibibazo bya Amerika nk’igihugu gikeneye impinduka no kugumana igitinyiro imbere y’ibindi bihugu.

Trump yagize ati: "Ntiwaba umuyobozi igihe wumva ko uje kugendera kubyo abandi bavuze cyangwa bakoze, igihe cyose udashobora kuzana ingamba nshya no gukora impiduramatwara, igihugu ntaho wakigeza, igihugu nka Amerika gikeneye umu Perezida udatinya guhangana n’ibibazo."

Mu kiganiro, Clinton yavuze ko uyu mugabo atari umuherwe nk’uko abyigamba cyangwa se niba ari n’umuherwe ko nta mutima wa kimuntu agira. Aha Trump yasubije avuga ko atigamba iby’imitungo ahubwo ayifite ikomoka ku kuba ari umuntu usobanukiwe n’ishoramari, nyuma y’uko mu 1975 Se yamugurije amafaranga macye akayazamukiraho ari byo bituma asigaye abarirwa mu bamiliyoneri isi ifite.

Aba bakandida bahanganiye kwegukana umwanya w’umukuru w’igihugu mu matora azaba mu kwezi k’Ugushyingo uyu mwaka. Bombi bagiye barangwa no guterana amagambo ndetse no gusebanya bya hato na hato, aho Trump yise Clinton shitani ndetse na Clinton akamwita umwiyemezi, ariko magingo aya bigeze aho umwe agaragaza impamvu zituma uwo bahanganye adakwiye kuyobora igihugu nka Leta Zunze Ubumwe za Amerika.

KANDA HANO UREBE VIDEOS UTASANGA AHANDI