USA: Igitero cyahitanye abantu 50, Donald Trump asaba ko Obama ahita yegura

Chief Editor | 13-06-2016
USA: Igitero cyahitanye abantu 50, Donald Trump asaba ko Obama ahita yegura

Donald Trump uri mu biyamamariza kuyobora Leta Zunze Ubumwe za Amerika, yasabye ko Perezida Barack Obama yahita yeguzwa kuko atigeze ahuza ubwicanyi bwakorewe mu mujyi wa Orlando n’intagondwa z’abayisilamu, anasaba ko Hillary Clinton bahanganye yahita arekeraho guhatanira kuba Perezida.

Kuri iki Cyumweru tariki 12 Kamena 2016, nibwo mu mujyi wa Orlando muri Leta Zunze Ubumwe za Amerika habaye igitero cyagabwe n’uwitwa Omar Mateen, w’imyaka 29 y’amavuko, uyu akaba ari umusore wavukiye muri New York ariko ku babyeyi bakomoka muri Afghanistan. Uyu musore byamaze kwemezwa ko ari uwo mu gatsiko k’intagondwa za Islam ndetse nazo zikabyigamba, yarashe abantu benshi, abasaga 50 barapfa, naho 53 barakomereka.

Ubwo Perezida Obama yavugaga ijambo ryo kwihanganisha imiryango yibasiwe n’iki gitero, yavuze ko ibyakozwe ari igikorwa kibi cy’iterabwoba n’urwango, anavuga ko hakwiye gukomeza kugenzurwa iby’abaturage b’abasivili batunze imbunda, ariko ntiyigera avuga ko bifite aho bihuriye n’intagondwa zo mu mutwe wa Islam, cyane ko hari hagikorwa iperereza kandi uwo mutwe utarabyigamba.

Ibi nibyo Donald Trump yahereyeho, avuga ko Obama akwiye guhita yegura ku mwanya w’umukuru w’igihugu vuba bidatinze. Yagize ati: "Mu ijoro ryakeye, igihugu cyacu cyatewe n’intagondwa zo mu mutwe wa Islam. Cyari igitero cya mbere kibi nyuma y’icyabaye tariki 11/9/2001, kikaba ari n’igitero cya kabiri kibaye mu mezi atandatu. Nifatanyije n’imiryango yabuze ababo ndetse n’abakomeretse. Mu ijambo rye, Perezida Obama, yadutesheje agaciro, ntiyanavuga byibuze ’intagongwa za kilisamu’ mu magambo ye, ku bw’iyo mpamvu, agomba guhita yegura."

Donald Trump kandi yanagarutse kuri Hillary Clinton bahanganiye umwanya wo kuyobora Leta Zunze Ubumwe za Amerika, avuga ko kuba atigeze agira icyo avuga ku by’izi ntagondwa za kisilamu, nta kabuza nawe akwiye kuva mu kibuga cy’abahatanira umwanya wa Perezida wa Leta Zunze Ubumwe za Amerika.

KANDA HANO UREBE VIDEOS UTASANGA AHANDI