Umudepite w’Umurundikazi wishwe yaba yazize urugamba yatangije amarira mu Rwanda?

Chief Editor | 14-07-2016
Umudepite w’Umurundikazi wishwe yaba yazize urugamba yatangije amarira mu Rwanda?

Urupfu rw’umudepite witwa Hafsa Mossi wari uhagarariye u Burundi mu Nteko Ishinga Amategeko y’Umuryango w’Ibihugu by’Afurika y’Uburasirazuba (EALA), rwashenguye benshi nyumwa y’uko yiciwe mu mujyi wa Bujumbura arashwe n’abantu bataramenyekana, nyamara benshi babihuza n’urugamba yatangiye ubwo yazaga mu Rwanda bikamurenga akarira.

Muri Kamena umwaka ushize, nibwo abadepite bagize Inteko Ishinga Amategeko y’Umuryango w’Ibihugu by’Afurika y’Uburasirazuba (EALA) basuye inkambi ya Mahama icumbikiwemo impunzi z’Abarundi mu Karere ka Kirehe, Depite Hafissa Mossi araturika ararira nyuma yo kubona ubuzima impunzi zibayemo, ariko yiyemeza gutangiza urugamba rwo kuba impirimbanyi ngo arebe ko ikibazo cyakemuka.

Depite Mossi yavuze ko ubuzima impunzi zibayemo budashimishije na gato kuko zakabaye ziri iwabo, ndetse azizeza kuzakora ubuvugizi afatanyije na bagenzi be maze ikibazo cyatumye zihunga kigashakirwa umuti bagasubira iwabo mu Burundi.

Byaramurenze ararira, ahava yiyemeje gutangira urugamba rwo gushaka icyarenganura abarundi bagataha

N’ubwo yarinze apfa umuti w’ibibazo by’u Burundi utaraboneka ndetse n’izi mpunzi zikiri mu nkambi ya Mahama, ari mu bayobozi b’u Burundi bahoraga bagaragaza akarengane k’Abarundi katumye abarenga 250.000 bahungira mu bihugu by’Abaturanyi birimo n’u Rwanda, kandi Leta ya Nkurunziza ishinjwa n’imiryango itandukanye kimwe n’abantu ku giti cyabo, kuba yica buri wese ikeka ko yaba adashyigikiye ibikorwa n’ubutegetsi buriho.

Depite Hafissa Mossi kandi kuba yarishwe kuri uyu wa Gatatu mu gihe Abarundi bari mu mishyikirano i Arusha muri Tanzania, nabyo bikomeje kwibazwaho kuko aho yari ari mu Burundi, ari umwe mu bakomezaga kurwana urugamba rwo gusaba ko Leta ya Nkurunziza yakwemera gucisha macye imbere y’abatavuga rumwe nayo, ku bw’inyungu z’abaturage b’iki gihugu.

Kuva yakwerekana akababaro ke, ntiyahwemye kurwana urugamba rwo kurangiza ikibazo

Kuva ikibazo cya manda ya gatatu ya Nkurunziza cyatangira guteza impagarara mu Burundi, iki gihugu cyakomeje kurangwa n’ubwicanyi, abasirikare bakuru n’abayobozi baraswa mu buryo budasobanutse bikaba bivugwa kenshi ko baba bicwa n’uruhande rwa Leta iba ibikangamo imbaraga zishobora kuyirwanya.

KANDA HANO UREBE VIDEOS UTASANGA AHANDI