Umugore wa Donald Trump yemeye ko yiganye ijambo rya Michelle Obama

Paola Abizera | 21-07-2016
Umugore wa Donald Trump yemeye ko yiganye ijambo rya Michelle Obama

Mu ijoro ryo kuri uyu wa Mbere ushize, mu gihe Melania Trump, umufasha wa Donald Trump yavugaga ijambo rye rya mbere nyamukuru mu nama nkuru y’abo mu ishyaka ry’ab Repubulika ari nayo nama yaje kwemeza umugabo we nk’umukandida w’iryo shyaka, uyu mugore yagaragaye arimo kugerageza kwiyibutsa amagambo amwe n’amwe nk’uwafashe mumutwe ibyo yagombaga kuvuga, ibintu byagaragaye nyuma ko yiganaga Michelle Obama.

Bidatinze umunyamakuru witwa Jarrett Hill kuri konti ye ya twitter yerekanye ko Melania Trump yateruye neza ijambo ku rindi, akivugira imbwirwaruhame ya Michelle Obama ndetse abantu bahita bashyiraho video zigaragaza neza uburyo yageragezaga kwigana Michelle Obama ndetse birakwirakwira vuba ku mbuga nkoranyambaga.

Amagambo yerekeranye no gukunda umurimo ndetse n’ibyerekeranye n’abana, niyo Melania Trump yiganye neza ijambo ku rindi ayakuye mu ijambo rya Michelle Obama ryo muri 2008.

JPEG - 138.9 kb

Imwe mu mafoto ya Michelle Obama yakwirakwijwe cyane ku mbuga nkoranyambaga

N’ubwo bikimara kuba abayobozi bashinzwe kwamamaza Donald Trump bahakanye ko batazi ko hari amagambo ya Michelle Obama yaba yasubiwemo na Melanie Trump, ibi bavuze byataye agaciro kuri uyu wa Kane ubwo umukozi wa Trump witwa Meredith Mclver yemeye ko ari we wafashije Melania Trump mu kwandika ijambo yavuze kuwa Mbere nimugoroba ndetse yemera ko ari we wafashe amagambo yavuzwe na Michelle Obama muri 2008 akayashyira mu ijambo rya Melanie.

Mclver yavuze ko mugihe yakoranaga na Melanie Trump bavuze ku bantu Melania abona nk’icyitegererezo kandi Michelle Obama yaje mu ba mbere, ndetse ko Melania yamusomeye amagambo kuva mu ijambo rya Michelle Obama ryo muri 2008 hanyuma nawe akayandika uko yayamusomeraga ndetse anayashyira mu ijambo Melania yari kuvuga atabanje kureba ijambo rya Michelle Obama.

Mclver yemeye ko ari amakosa ye kuba atakurikiye ijambo rya Michelle Obama kandi ko ari we amakosa yose yakagombye kujyaho, ndetse ko yumva amerewe nabi ku bibazo yateje Melania ndetse na Michelle Obama. Mclver yanavuze ko yashatse gusezera ku kazi ariko abamukuriye ntibamwemerera.

Melania Trump wavukiye muri Slovenia ndetse unavuga indimi nyinshi muri zo hakabamo icyongereza, nawe yemeye ko koko hari ubufasha yabonye mu gutegura ijambo rye.

Dore imwe muri video zarebwe cyane zigereranya ijambo rya Michelle Obama ryo muri 2008 n’iryo Melania yavuze:

KANDA HANO UREBE VIDEOS UTASANGA AHANDI