Umunyamakuru wajyaga unenga cyane Perezida Vladimir Putin yishwe nabi - Amafoto

Chief Editor | 21-07-2016
Umunyamakuru wajyaga unenga cyane Perezida Vladimir Putin yishwe nabi - Amafoto

Umunyamakuru ukomoka mu gihugu cya Ukraine wari uzwiho kunenga cyane ubutegetsi bwa Vladimir Putin uyobora u Burusiya, yiciwe mu modoka ye ubwo yari ageze mu mujyi wa Kiev ajya ku kazi ke. Ubuyobozi bw’igihugu cya Ukraine busanga ubu ari ubwicanyi bwakozwe nyuma yo kunoza umugambi simusiga wo kumuhitana.

Ababonye ubu bwicanyi, bahamirije ibiro ntaramakuru by’Abongereza, Reuters, ko uyu munyamakuru w’imyaka 44 y’amavuko witwa Pavel Sheremet yarashwe ubwo yari mu modoka ye, bakaba barumvise ibintu biturika bajya kureba bagasanga imodoka yabaye umuyonga. Polisi ivuga ko bishoboka ko hari igisasu cyari cyatezwe munsi y’intebe uyu munyamakuru yari yicayeho mu modoka ye.

Imodoka yari arimo yahindutse umuyonga

Sheremet yari umwe mu banyamakuru bakunzwe, bubashwe kandi bazwi cyane mu gihugu cya Ukraine. Yakoraga mu buryo bweruye nk’umunyamakuru unenga cyane imiyoborere ya Perezida Vladimir Putin w’u Burusiya, ndetse yanavuganiraga cyane abatavuga rumwe n’ubutegetsi bwe.

Uyu munyamakuru yari akunzwe cyane kandi yubahwa cyane mu gihugu cye

Urupfu rw’uyu munyamakuru, rukomeje guhuzwa cyane n’umwuga yakoraga ndetse n’urwango yari afitiwe n’ubutegetsi bw’igihugu cy’u Burusiya. Umwaka ushize, nibwo umwe mu bakoranaga bya hafi n’uyu munyamakuru nawe yishwe, uwo akaba ari Boris Newtsov wari ukuriye umutwe utavuga rumwe n’ubutegetsi bw’u Burusiya. Uku kwicwa kwabo kose, Ukraine irabishinja ubutegetsi bwa Vladimir Putin.

Ni kenshi yajyaga anenga ubutegetsi bwa Perezida Putin, kuburyo bikekwa ko yaba ari byo yazize.

Perezida wa Ukraine, Petro Poroshenko nawe yashenguwe n’uru rupfu. Mu magambo ye ati: "Iri ni ishyano riguye i Kiev. Nta kindi nabona nabasha kubivugaho, njyewe Pavel nari muzi ubwanjye. Nihanganishije inshuti n’abavandimwe be, namaze gutegeka ababishinzwe gukora iperereza byihuse..."

Iperereza rigomba gukorwa hitabwa cyane ku bafite aho bahuriye n’akazi k’itangazamakuru yakoraga, ariko hanibandwa by’umwihariko ku rwango ubutegetsi bw’igihugu cy’u Burusiya bwamwangaga.

KANDA HANO UREBE VIDEOS UTASANGA AHANDI