Umwami w’abami w’u Buyapani yisabiye ko yava ku ngoma

Paola Abizera | 8-08-2016
Umwami w’abami w’u Buyapani yisabiye ko yava ku ngoma

Umwami w’abami w’u Buyapani, Emperor Akihito w’impaka 82, mu butumwa budasanzwe yagejeje ku baturage b’iki gihugu kuri uyu wa Mbere, yavuze ko atewe impungenge n’uko imyaka ye idatuma akora akazi ke nk’uko bikwiriye, ibintu byafashwe nko gusaba kuva ku butegetsi.

Ikigo cy’igihugu cy’itangazamakuru NHK cyatangaje ukwezi gushize ko Akihito wigeze kubagwa umutima ndetse akaba ari kuvurwa indwara ya kanseri ifata mu myanya y’ibanga, yashatse kuva ku ngoma kuva mu myaka micye ishize, ibintu bitari bimenyerewe mu Buyapani kuko ubusanzwe Umwami w’abami asimburwa ari uko apfuye.

Itegeko nshinga ryo mu Buyapani risobanura Umwami w’abami nk’ishingiro ry’igihugu n’ubumwe bw’abaturage, gusa ntabwo Umwami w’abami afite ububasha bwa politiki.

Mu mvugo ye, Emperor Akihito yirinze kuvuga ko ashaka kuva ku ngoma ibintu byari gufatwa nko kwivanga muri politiki kuko amategeko ahari atabimwemerera ndetse bikaba ari inshingano z’abanyapolitiki bashinzwe gutora amategeko.

Naotaka Kimizuka, Umuhanga mu by’ubwami muri Kaminuza ya Kanto Gakuin yabwiye itangazamakuru ati “Ni nk’aho Emperor yavugaga ngo nyabuna mungirire vuba”.

Akihito yagiye ku ngoma muri 1989 nyuma y’urupfu rwa se Hirohito. Ku ngoma ya Hirohito nibwo u Buyapani bwarwanye mu ntambara ya kabiri y’isi. Akihito yagerageje gusubiza imigenderane myiza yari yangijwe n’intambara zo muri Aziya akora ingendo nyinshi mu mahanga ndetse yanagerageje kwegereza ubwami abaturage basanzwe.

Ubushakashatsi bwerekana ko benshi mu baturage basanzwe mu Buyapani bemeranywa n’umwami w’abami ko yakagombye kuruhurwa ariko ibyo bikeneye ko habanza guhindurwa amategeko. Hashize igihe Akihito atabasha kwitabira imirimo ye yose ndetse rimwe na rimwe agahagararirwa n’umwana we uzamusimbura witwa Prince Naruhito umaze kugira imyaka 56, gusa hari inshingano atabashaga kumusimburamo.

Abatifuza ko Umwami w’abami ava ku ngoma bose bahuriza ku kuba badashaka ko hasubirwamo itegeko ryerekeranye n’ubwami, kuko bafite impungenge ko hari abashaka kongeramo ko abakobwa nabo bashobora gutegeka na cyane ko Naruhito uzasimbura se, we afite umwana umwe gusa w’umukobwa.

Ukurikije amategeko ahari, nyuma ya Naruhito hagomba gukurikira murumuna we witwa Akishino hanyuma nawe akazakurikirwa n’umwana we w’umuhungu kuri ubu ufite imyaka icyenda witwa Hisahito.

Minisitiri w’intebe w’u Buyapani, Shinzo Abe yabwiye abanyamakuru ko ukurikije inshingano n’imyaka y’umwami w’abami byari ngombwa gutekereza uburyo byakorwa ngo aruhurwe.

KANDA HANO UREBE VIDEOS UTASANGA AHANDI