Urutonde rw’abakuru b’ibihugu bya Afurika bize bakaminuza cyane kurusha abandi

Chief Editor | 18-07-2016
Urutonde rw’abakuru b’ibihugu bya Afurika bize bakaminuza cyane kurusha abandi

Mu bakuru b’ibihugu bya Afurika, harimo abize cyane bakabona impamyabumenyi zihambaye zirimo n’iz’ikirenga (PhD). Harimo abaminuje mu by’amategeko, ibya Politiki, iby’ubukungu n’ibindi binyuranye, gusa akenshi ibi usanga bitanahura cyane n’imiyoborere yabo.

Muri iyi nkuru, turabagezaho urutonde rw’abakuru b’ibihugu bya Afurika bize bakaminuza cyane kurusha abandi. Muri uru rutonde, turakugezaho 13 muri bo bayoboye abandi mu kugira impamyabumenyi zihanitse, aho duhera ku mwanya uheruka tugenda tugana ku myanya ya mbere.

13) Hassan Sheikh Mohamud (Somalia)

JPEG - 41.5 kb

Hassan Sheikh Mohamud ni Perezida wa Somalia. Afite impamyabumenyi y’icyiciro cya gatatu cya Kaminuza (Master’s Degree) yakuye muri Bhopal University yo mu Buhinde aho yize ibijyanye n’ikoranabuhanga mu burezi.

12) Hage Geingob (Namibia)

JPEG - 30.5 kb

Hage Gottfried Geingob, ni Perezida wa Namibia. Yize amashuri ye muri Kaminuza ya Philadelphia mu 1964, aza kubona impamyabumenyi y’icyiciro cya kabiri cya Kaminuza yakuye muri Fordham University mu mujyi wa New York, hanyuma aza kubona impamyabumenyi y’icyiciro cya gatatu cya Kaminuza yakuye nayo aha i New York, aho yize ibijyanye n’ubugeni.

11) Jorge Carlos Fonseca (Cape Verde)

JPEG -

Jorge Carlos de Almeida Fonseca, ni Perezida wa Cape Verde kuva tariki 9 Nzeri 2011. Nyuma yo kwiga amashuri abanza n’ayisumbuye mu gihugu cye, yagiye gukomereza Kaminuza muri Portugal aho yakuye impamyabumenyi y’icyiciro cya gatatu cya Kaminuza mu by’ubumenyi mu mategeko.

10) Ellen Johnson Sirleaf (Liberia)

JPEG - 76.3 kb

Madamu Ellen Johnson Sirleaf, ni Perezida wa Liberia. Yize amashuri ya Kaminuza muri College of West Africa no muri Madison Business College, akomereza muri Kaminuza yo muri Colorado muri Leta Zunze Ubumwe za Amerika aho yakuye impamyabumenyi y’icyiciro cya gatatu cya Kaminuza mu bijyanye n’imiyoborere.

9) Faure Gnassingbé (Togo)

JPEG - 175.3 kb

Faure Gnassingbé uyobora igihugu cya Togo, yize amashuri ye yisumbuye mu mujyi wa Lome, hanyuma akomereza Kaminuza i Paris mu Bufaransa aho yakuye impamyabumenyi y’icyiciro cya kabiri mu bijyanye n’imicungire y’ibigo by’ubucuruzi, hanyuma impamyabumenyi y’icyiciro cya gatatu cya Kaminuza ayikura muri Leta Zunze Ubumwe za Amerika muri The George Washington University, aha akaba yarahize iby’imiyoborere y’ibigo by’ubucuruzi.

8) Robert Mugabe (Zimbabwe)

JPEG - 34 kb

Perezida Robert Mugabe, afite impamyabumenyi zirindwi, harimo iyo yakuye muri Kaminuza ya For Hare muri Afrika y’Epfo ari naho Nelson Mandela yize, aha Mugabe akaba yarahakuye impamyabumenyi y’icyiciro cya kabiri cya Kaminuza mu by’ubugeni. Izindi mpamyabumenyi z’ikirenga yagiye azibona yize muri gahunda y’iya kure (Distance Learning), muri izi hakaba harimo izo yigiye ari muri gereza, aho yize ibijyanye n’imitegekere, uburezi, amategeko n’ibindi bitandukanye.

7) Ibrahim Boubacar Keïta (Mali)

JPEG - 49.6 kb

Ibrahim Boubacar Keïta uyobora Mali kuva tariki 4 Nzeri 2013, yize muri Lycée Janson-de-Sailly i Paris mu Bufaransa ndetse no muri Lycée Askia-Mohamed iwabo mu mujyi wa Bamako, yiga muri Kaminuza ya Dakar ndetse na Kaminuza y’i Paris. Afite impamyabumenyi ebyiri z’icyiciro cya gatatu cya Kaminuza, imwe mu bumenyi mu bya Politiki, indi mu by’amateka.

6. John Pombe Magufuli (Tanzania)

JPEG - 30.5 kb

John Pombe Magufuli, ni Perezida w’igihigu cya Tanzania. Afite impamyabumenyi yo ku rwego rwa (PhD) mu bijyanye n’ubutabire yakuye muri Kaminuza ya Dar es Salaam mu gihugu cya Tanzaniya aho yize kuva mu mwaka wa 2006 kugera muri 2009.

5) Dr. Ameenah Gurib (Mauritius)

JPEG - 43.8 kb

Dr. Ameenah Gurib-Fakim ni umugore uyobora ibirwa bya Mauritius. Yize muri Kaminuza zitandukanye, zirimo iyo mu Bwongereza yitwa University of Surrey yakuyemo impamyabumenyi y’icyiciro cya kabiri cya Kaminuza mu 1983, aho yize iby’ubutabire. Nyuma yagiye muri Exeter University aho yakuye impamyabumenyi y’ikirenga (PhD) aho yakomeje kunononsora iby’ubutabire (organic chemistry).

4) Dr. Mulatu Teshome (Ethiopia)

JPEG - 240.9 kb

Dr. Malatu Teshome ayobora Ethiopia kuva tariki 7 Ukwakira 2013. Yize amashuri ye mu Bushinwa, aho yakuye impamyabumenyi y’icyiciro cya kabiri cya Kaminuza mu bya filozofiya (philosophy), nyuma arakomeza aza gukura impamyabumenyi y’ikirenga (PhD) mu by’amategeko mpuzamahanga, yakuye muri Peking University.

3) Alassane Ouattara (Côte d’Ivoire)

JPEG - 24.3 kb

Alassane Dramane Ouattara ni Perezida w’igihugu cya Côte d’Ivoire. Yabonye impamyabumenyi y’icyiciro cya kabiri cya Kaminuza mu by’ikoranabuhanga muri Drexel University, i Philadelphia muri Leta Zunze Ubumwe za Amerika. Nyuma yaje gukomereza muri University of Pennsylvania, aho yakuye impamyabumenyi y’icyiciro cya gatatu cya Kaminuza, ndetse n’impamyabumenyi y’ikirenga (PhD) mu by’ubukungu.

2) Dr. Peter Mutharika (Malawi)

JPEG - 118.9 kb

Dr. Peter Mutharika ni Perezida w’igihugu cya Malawi. Yabonye impamyabumenyi y’icyiciro cya kabiri cya Kaminuza muri Kaminuza ya London mu Bwongereza aho yize amategeko, nyuma aminuriza muri Yale University aho yakuye impamyabumenyi y’icyiciro cya gatatu cya Kaminuza mu by’amategeko, ndetse anahakura iy’ikirenga (PhD) mu bumenyi mu by’ubucamanza.

1) King Mohammed VI (Morocco)

JPEG - 59 kb

Mohammed VI, umwami w’igihugu cya Maroc, yize amashuri abanza n’ayisumbuye mu ishuri ry’ibwami, aza kubona impamyabumenyi y’icyiciro cya mbere cya Kaminuza mu 1981, ahita akomereza muri Mohammed V University iherereye ahitwa Agdal aho yakuye impamyabumenyi y’icyiciro cya kabiri cya Kaminuza mu by’amategeko. Yakomeje kuminuza mu by’amategeko aho yabonyemo impamyabumenyi nyinshi, kugeza ubwo yaje kubona iy’ikirenga muri Kaminuza yo mu mujyi wa Nice mu Bufaransa.

0) Dr. Thomas Boni Yayi (Benin)

JPEG - 407.6 kb

Dr. Thomas Boni Yayi yari Perezida wa Benin kuva tariki 6 Mata 2006 kugeza tariki 6 Mata 2016, bivuga ko hashize iminsi micye avuye ku butegetsi, gusa ni umwe mu baminuje bihambaye ndetse abakiri ku butegetsi mu bihugu bitandukanye muri Afurika ntawigeze ageza ahe, ari nayo mpamvu agaragaye kuri uru rutonde amaze iminsi avuyeho, n’ubwo agifite ubudahangarwa nk’uwayoboye igihugu cye imyaka 10. Afite impamyabumenyi y’icyiciro cya gatatu cya Kaminuza mu by’ubukungu yakuye muri Kaminuza y’igihugu cye. Yarakomeje akura indi mpamyabumenyi nk’iyi muri Cheikh Anta Diop University yo mu mujyi wa Dakar muri Senegal.

Iby’ubukungu yarabyize arabinononsora cyane, kugeza abonye impamyabumenyi y’ikirenga (PhD) mu by’ubukungu na politiki yakuye muri Kaminuza ya Orléans mu Bufaransa. Yarongeye kandi akomeza kwiga, abona indi mpamyabumenyi y’ikirenga (PhD) mu bukungu, yakuye muri Paris Dauphine University.

KANDA HANO UREBE VIDEOS UTASANGA AHANDI