Zimbabwe: Abo mu ishyaka rya Robert Mugabe bakoze imyigaragambyo itavugwaho rumwe

Chief Editor | 26-05-2016
Zimbabwe: Abo mu ishyaka rya Robert Mugabe bakoze imyigaragambyo itavugwaho rumwe

Kuri uyu wa Gatatu tariki 25 Gicurasi 2016, i Harare mu murwa mukuru w’igihugu cya Zimbabwe habaye imyigaragambyo y’abashyigikiye ko Perezida Robert Mugabe yongera kwiyamamaza, mu gihe hamaze iminsi hari impaka ku muntu ugomba kumusimbura.

Perezida Robert Mugabe, niwe muyobozi rukumbi abaturage ba Zimbabwe bazi kuva iki gihugu cyava mu maboko y’Abakoloni b’abongereza bakabona ubwigenge, hari mu mwaka w’1980. Ku myaka ye 92 y’amavuko, yamaze gushimangira ko azongera kwiyamamaza mu matora y’umukuru w’igihugu azaba muri 2018, ubwo azaba ari umukambwe w’imyaka 94.

Kongera kwiyamaza kwa Robert Mugabe, ni ikintu abatavuga rumwe n’ubutegetsi bwe badakozwa na gato, ikirenze kuri ibyo na bamwe mu bo mu ishyaka rye rya ZANU-PF bifuza ko hagira umusimbura kuko ashaje. Hari igice gishaka ko yasimburwa n’umugore we Grace Mugabe, n’ikindi gishaka ko yasimburwa na Visi Perezida Emmerson Mnangagwa.

Nyamara kuri uyu wa Gatatu, ibihumbi byinshi by’abo mu ishyaka rya Robert Mugabe biganjemo urubyiruko, bigaragambyaga baririmba ko nta wundi muyobozi ubereye Zimbabwe utari Mugabe ndetse basaba abatekereza gushaka umusimbura ko babihagarika. Bavuga ko Robert Mugabe ari we userukira abandi bakuru b’ibihugu bya Afurika mu guhangana n’agasuzuguro k’abanyaburayi.

Obert Gutu uvugira uruhande rutavuga rumwe n’ubutegetsi, avuga ko iyi myigaragambyo igamije kuburizamo umugambi wo kweguza Perezida Mugabe. Ashimangira ko abaturage barembejwe n’ubukene, ishyaka rya ZANU-PF rikaba rishaka kubashuka ngo ribarangaze be guhaguruka ngo bamwamagane na mbere y’uko umwaka wa 2018 uza.

KANDA HANO UREBE VIDEOS UTASANGA AHANDI