Perezida Nkurunziza yaba yaranze kuva ku butegetsi yikanga igihano cy’urupfu yakatiwe?

Chief Editor | 7-05-2016
Perezida Nkurunziza yaba yaranze kuva ku butegetsi yikanga igihano cy’urupfu yakatiwe?

Ikibazo cy’umutekano mu Burundi, impunzi nyinshi ziri mu bihugu by’abaturanyi, abantu bakomeje kwicwa umusubirizo, ubutegetsi bwa Pierre Nkurunziza wiyamarije manda ya gatatu benshi bemezaga ko atari ayemerewe, ibyo byose n’ibindi bishamikiyeho biri mu bituma uyu mukuru w’igihugu n’igihugu cye, badasiba kuvugwa mu bitangazamakuru bitandukanye hirya no hino ku isi.

Abahanga mu by’amategeko na politiki, bakomeje kugaragaza ko Pierre Nkurunziza yaba yarashatse kuguma ku butegetsi ngo akomeze kugumana ubudahangarwa nk’umukuru w’igihugu, atinya ko igihano cyo gupfa yakatiwe cyahita gishyirwa mu bikorwa.

Mu mwaka w’1998, Pierre Nkurunziza wari umaze kugirwa umunyamabanga mukuru wa CNDD FDD, yakatiwe n’urukiko igihano cyo gupfa azira ibyaha by’intambara ariko nticyahita gishyirwa mu bikorwa. Ubushyamirane bw’ishyaka yari ayoboye na Leta batavugaga rumwe yo ku butegetsi bwa Domitien Ndayizeye, byaje gutuma Nkurunziza ahabwa imbabazi ntiyicwa ahubwo hasinywa amasezerano y’amahoro hagati ya Leta na CNDD-FDD, ibyaha birirengagizwa ku bw’ayo masezerano y’amahoro. Icyo gihe hasinywa amasezerano y’amahoro, hari mu mwaka wa 2003.

Mu mwaka wa 2004, nyuma y’amasezerano yo gushyira intwaro hasi, Nkurunziza yagizwe Minisitiri w’Imiyoborere myiza muri Guverinoma y’inzibacyuho ya Perezida Domitien Ndayizeye. Muri 2005, yatanzwe nk’umukandida w’ishyaka rya CNDD-FDD ku mwanya wa Perezida wa Repubulika, aza no guhita atorerwa uwo mwanya mu matora yakozwe n’abari bagize Inteko Ishinga Amategeko. Yatangiye kuyobora nka Perezida tariki 26 Kanama 2005.

Nyuma yo gushyira umukono ku masezerano y’amahoro ndetse agahita anatorerwa kuyobora u Burundi, igihano cy’urupfu yari yarakatiwe cyaje kumera nk’aho kibagiranye ariko mu gihe yari kuba aretse kongera kwiyamamariza kuyobora u Burundi mu mwaka ushize, byashobokaga ko dosiye y’igihano yakatiwe yari guhita ibyutswa, wenda kikaba cyahindurwamo igihano cy’igifungo cya burundu.

KANDA HANO UREBE VIDEOS UTASANGA AHANDI