Abanyamadini bo mu Bufaransa bahiye ubwoba, baratakambira Perezida

Bikorimana Alexis | 28-07-2016
Abanyamadini bo mu Bufaransa bahiye ubwoba, baratakambira Perezida

Umupadiri wishwe kuwa Kabiri i Normandie mu gihugu cy’u Bufaransa ubwo yacibwaga umutwe igihe yasomaga misa, yatumye abahagarariye amadini muri icyo gihugu basaba Leta kubaha ababacungira umutekano bihariye.

Abahagarariye abakristu, aba Islam, abayahudi ndetse n’aba Budhiste, baganiriye na Perezida w’u Bufaransa, Francois Hollande, bamusaba ko byaba byiza babahaye abashinzwe umutekano bahoraho bazabacungira umutekano ku nsengero, imisigiti, n’ahandi hateraniye abavuga ijambo ry’Imana.

Nyuma y’uko umupadiri witwa Jacques Hamel yishwe atewe icyuma ubwo yari arimo gusoma misa ya mu gitondo, abanyamadini bo mu Bufaransa batangiye kugira ubwoba bikanga ko ibitero nk’ibi byo mu mutwe w’intagondwa za kisilamu bishobora kongera kubibasira.

Ubu bwicanyi bwabayeho nyuma y’iminsi 12 hishwe abantu basaga 84 mu gitero cyabereye i Nice. Umukuru w’idini rya Islam, Dalil Boubakeur, uhagarariye umusigiti uri mu murwa mukuru i Paris, arasaba byimazeyo guhabwa ingabo zo gucunga umutekano aho basengera kuko ngo bishoboka ko abo bagizi ba nabi igihe icyo aricyo cyose bagaruka.

Muri ibi biganiro kandi, munsenyeri mukuru wa Paris yaboneyeho gutangaza ko bishimiye ubufatanye buri hagati y’amadini, anavuga ko ibyo umutwe w’iterabwoba ugendera ku mahame ya kisilamu ushaka byo kuryanisha amadini utabigeraho.

Umwe bakekwaho kuba barishe padiri Jacques Hamel ngo yaba yamaze kumenyekana, akaba yitwa Adel Kermiche wo mu kigero cy’imyaka 19, kandi ngo ajya akunda kujya muri Syria kuvugana n’umutwe wa IS.

Prezida Francois Hollande ndetse n’abahagarariye inzego z’umutekano, ubu barajwe ishinga no gushaka icyakorwa kugira ngo abanyamadini bongere bishyire bizane mu ivugabutumwa ryabo muri icyo gihugu.

KANDA HANO UREBE VIDEOS UTASANGA AHANDI