Abanyeshuri batwitse amacumbi yabo kubera kubuzwa kureba imikino ya Euro 2016

Chief Editor | 27-06-2016
Abanyeshuri batwitse amacumbi yabo kubera kubuzwa kureba imikino ya Euro 2016

Abanyeshuri bo mu kigo cya Itierio Boys High School cyo mu gihugu cya Kenya, batwitse amacumbi arindwi (7) y’abanyeshuri bo muri iki kigo, nyuma y’uko abayobozi babo banze ko bazajya bareba kuri televiziyo imikino y’umupira w’amaguru y’igikombe cya Euro 2016 gikomeje kubera mu Bufaransa.

Kuwa Gatandatu w’iki Cyumweru gishize nibwo abanyeshuri bamenyeshejwe ko ubuyobozi bw’ikigo butabemerera kureba umukino wa Euro 2016 wahuje Portugal na Croatia, ibi birabarakaza cyane maze baza gufata umwanzuro wo gushumika amacumbi yabo.

Apollo Omungu, umuyobozi w’iki kigo wungirije, yatangarije ikinyamakuru Daily Nation ko abanyeshuri batangiye kwigaragambya ahagana saa mbiri z’umugoroba, nyuma y’amasaha abiri babwiwe kuva mu cyumba cy’imyidagaduro cy’ikigo bakajya gusubiramo amasomo yabo.

Apolo ati: "Twagerageje kubasaba ngo batuze ariko barushaho guteza akaduruvayo, bose basohoka mu mashuri yabo. Nyuma yo kubategeka kujya mu macumbi yabo, twashidutse tubona amazu babagamo yafashwe n’inkongi y’umuriro".

Uretse gutwika aya macumbi, abanyeshuri banateraguye amabuye ku zindi nyubako z’ikigo bamenagura ibirahure banangiza ibindi byinshi. Banagerageje kandi kwinjira mu kindi kigo cy’abakobwa baturanye cyitwa Itierio Girls High School ariko ntibyabakundira, ariko nacyo bagiteyemo amabuye menshi biteza umutekano mucye muri aka gace kose.

Abayobozi batandukanye barimo n’abashinzwe uburezi mu gihugu cya Kenya, basabye Polisi y’iki gihugu gukora iperereza igata muri yombi abanyeshuri bakoze uru rugomba bagafungwa, kuko bangije byinshi bizateza ikibazo mu myigire yabo na bagenzi babo.

KANDA HANO UREBE VIDEOS UTASANGA AHANDI