Birakaze mu bihugu bifite ibitwaro kirimbuzi. Haba hagiye kuba intambara ya 3 y’isi yose?

Chief Editor | 17-10-2016
Birakaze mu bihugu bifite ibitwaro kirimbuzi. Haba hagiye kuba intambara ya 3 y’isi yose?

Gushotorana no guterana amagambo kw’ibihugu by’ibihangange ku isi, nibyo byagiye bikurura amakimbirane yateje intambara ya mbere n’iya kabiri z’isi yose. Iheruka, yasojwe n’intsinzi ya Leta Zunze Ubumwe za Amerika zakoresheje ibitwaro kirimbuzi byatewe i Nagasaki n’i Hiroshima mu Buyapani ndetse n’ubu ingaruka zabyo Abayapani baracyahura nazo.

Ubu ariko, ibihugu byinshi bikomeye ku isi kandi bifite ibi bitwaro bya kirimbuzi, birimo guterana amagambo, gushotorana no kuvuga byeruye ko byiteguye intambara ikomeye. Aho ikoranabuhanga mu by’ibitwaro bya kirimbuzi rigeze ku isi, herekana ko hagize igihugu muri ibi cyatera ikindi, haba intambara yahindura umuyonga ibice binini by’isi kandi igasiga ingaruka zizibasira igihe kirekire ikiramwamuntu n’ibindi biremwa biri ku isi, nk’uko n’abana bavuka ubu mu Buyapani bakibasirwa n’ibisasu byatewe tariki 6 Kanama 1945.

Bimwe mu bihugu byigamba ko bifite ibitwaro bya kirimbuzi, ibindi bibyibitseho mu ibanga bidashaka kwerurira isi, mu gihe hari ibindi bikibigerageza, hakaba n’ibindi bidashidikanywaho kuba bifite ibi bitwaro kirimbuzi, bikanabiheraho bishyira imbere ubushotoranyi no kwishongora ku bindi bihugu.

Leta Zunze Ubumwe za Amerika, u Burusiya, Israel, U Bushinwa, U Bufaransa, U Buhinde, Pakistan, Koreya ya Ruguru, U Bubiligi, u Budage, U Butaliyani, U Buholandi na Turikiya ni byo bihugu bizwi ko bifite ibi bitwaro nta gushidikanya, gusa hari ibindi bibyigamba nabyo bidashobora gushirwa amakenga.

SOMA INKURU BIJYANYE HANO: Urutonde rw’ibihugu bifite ibitwaro kirimbuzi byahindura isi umuyonga mu kanya gato

Ibi bihugu byose kandi, bigiye birimo ibifitanye ubufatanye mu bya gisirikare kuburyo kimwe muri byo giteye cyangwa kigaterwa kikinjira mu ntambara ikomeye, hari ibindi byagitabara. Muri iyi minsi, hari ibihugu birimo kuzamura ubushotoranyi no kuvuga ko byiteguye intambara, kandi ubu bwirinzi bw’ibitwaro bya kirimbuzi bukaba ari bwo biheraho byihagararaho.

Igihugu cya Leta Zunze Ubumwe za Amerika, kimaze iminsi cyotsa igitutu u Burusiya kibushinja ibyaha by’intambara muri Syria, gusa Perezida Vladmin Putin w’u Burusiya we muri iki cyumweru dusoje yatangaje ko yiteguye intambara n’igihugu cyose kizashotora cyangwa kigashaka kwitambika u Burusiya, aha byumvikanaga ko yashakaga kuvuga Leta Zunze Ubumwe za Amerika.

Perezida Putin azwiho kuba umugabo utavugirwamo kandi udakangwa n’intambara

Mu gitondo cyo kuri uyu wa Mbere, U Burusiya bwashinje Amerika gushaka gutera ubwoba no kwinjira mu buzima bwite bw’igihugu cyabo. Ikinyamakuru Daily Star kivuga ko igisirikare cy’u Burusiya cyemeje ko kiteguye guharanira inyungu zacyo, kandi ko niba Amerika ishaka intambara izayibona nta kabuza. Leta Zunze Ubumwe za Amerika zotsa igitutu u Burusiya ngo buhagarike ibitero bugaba muri Syria n’ubwo ibi butabikozwa.

Perezida Vladimir Putin kandi aherutse gutangaza ko igihugu cye kiteguye intambara, ndetse abaturage b’igihugu cye babwirwa gutangira gutegura uburyo bwo kwirwanaho mu ntambara ikomeye igihugu cyabo cyenda kwinjiramo. Ibi byose bikomeza kugaragaza ko hashobora kuba intambara ikomeye hagati y’ibi bihugu.

Uretse u Burusiya, Koreya ya ruguru nayo yamaze gutangaza ko yiteguye kohereza ibitwaro bya kirimbuzi kuri Leta Zunze Ubumwe za Amerika. Lee Yong Pil, umwe mu byegera bya Perezida wa Koreya ya Ruguru, yatangarije NBC News ko niba Leta Zunze Ubumwe za Amerika ishaka kubagabaho ibitero, bo biteguye kubatanga bakabikora mbere.

Koreya ya Ruguru nayo iryamiye amajanja, kandi yiteguye intambara na Amerika

Yagize ati: "Ibitwaro bya kirimbuzi si umutungo Leta Zunze Ubumwe za Amerika bafite bonyine. Nitubona bashaka kutugabaho igitero, tuzabatanga tubibakorere mbere. Dufite natwe iryo koranabuhanga... Leta Zunze Ubumwe za Amerika yamaze kudutunga ibitwaro bya kirimbuzi, ishaka kwibasira igihugu cyacu, umurwa mukuru wacu n’umuyobozi wacu dukunda, Kim Jong Un. Ntabwo tuzatuza mu gihe Leta Zunze Ubumwe za Amerika ishaka tubwibasira n’ibitwaro bya kirimbuzi."

Samantha Power, Ambasaderi wa Leta Zunze Ubumwe za Amerika mu Muryango w’Abibumbye, we yabwiye NBC News ko igihugu cye nacyo kitaterera agati mu ryinyo, kandi ko Koreya ya Ruguru idashaka kwibasira iguhugu cyabo ahubwo ishaka kwibasira ikiremwamuntu muri rusange. Yagize ati: "Tugomba kurushaho kubotsa igitutu, kuko baribasira ikiremwamuntu si Leta Zunze Ubumwe za Amerika bibasira, si na Koreya y’Amajyepfo gusa."

Igihugu cya Leta Zunze Ubumwe za Amerika gisanzwe kizwi nk’igihangange, ninacyo cyateye bwa mbere ibitwaro kirimbuzi

Mu byo Leta Zunze Ubumwe za Amerika baziza Koreya y’Amajyaruguru, harimo n’ubushotoranyi ihoza ku gihugu baturanye cya Koreya y’Amajyepfo. Ikinyamakuru Daily Mail kivuga ko abayobozi ba Leta Zunze Ubumwe za Amerika, batemera ko Koreya ya Ruguru yaba ifite ibitwaro bya kirimbuzi biri ku rwego nk’urw’ibyabo.

KANDA HANO UREBE VIDEOS UTASANGA AHANDI