Gereza Kizza Besigye ufungiyemo yabayemo imirwano ikaze, umuntu umwe apfiramo

Chief Editor | 15-05-2016
Gereza Kizza Besigye ufungiyemo yabayemo imirwano ikaze, umuntu umwe apfiramo

Umwe mu mfungwa zari zifungiwe hamwe na Dr Kizza Besigye utavuga rumwe n’ubutegetsi bwa Perezida Museveni, yaguye mu mirwano ikaze yabaye hagati n’imfungwa nyuma y’akaduruvayo katejwe n’iyinjizwa rya Kizza Besigye muri gereza ya Moroto. Ibi byabaye nyuma y’amasaha atatu urukiko rutegetse ko Kizza Besigye afungwa kugeza tariki 25 Gicurasi, aho akurikiranyweho ibyaha byo kwigomeka ku butegetsi no kugambanira igihugu.

Kuwa Kane tariki 12 Gicurasi 2016, Kizza Besigye wanze kwemera ibyavuye mu matora yabaye muri Gashyantare uyu mwaka, yarahiriye mu mujyi wa Kampala avuga ko ari we Perezida wa Uganda, ibi akaba yarabikoze habura umunsi umwe ngo Yoweri Museveni watsinze amatora arahire.

Ibi byatumye ahita atabwa muri yombi na Polisi ya Uganda yamushinjaga guteza akaduruvayo mu mujyi wa Kampala, maze mu masaha y’umugoroba indege ya kajugujugu imuvana muri uyu mujyi imujyana kumufungira ahitwa Moroto ari naho afungiye kugeza ubu.

Ikinyamakuru Daily Monitor, kivuga ko ubwo Kizza Besigye yamaraga gusomerwa ibyaha ashinjwa akinjizwa muri gereza ya Moroto, hari bamwe mu mfungwa batangiye gusakuza cyane bishimira kuba bagiye gufunganwa n’uyu munyapolitiki ukundwa n’abagande batari bacye, mu gihe hari izindi mfungwa zasabaga ko bagabanya urusaku, ibyo bikurura impaka zavuyemo n’imirwano umwe ayitakarizamo ubuzima.

William Aweny uyobora gereza ya Moroto, nawe yemeje aya makuru y’imirwano yabereye muri gereza abereye umuyobozi ndetse n’ay’urupfu rw’umwe mu mfungwa, ariko avuga ko bidakwiye guhuzwa n’ifungwa rya Dr Kizza Besigye.

Uwapfuye yitwa Michael Lodia, akaba yari asanzwe afungiwe icyaha cy’ubwicanyi. Uwo barwanye we yitwa Joseph Lomer, we akaba asanzwe afungiwe icyaha cy’ubujura, ubu akaba agiye no gukurikiranwaho icyaha cy’ubwicanyi.

KANDA HANO UREBE VIDEOS UTASANGA AHANDI