Habonetse umurambo bikekwa ko ari uw’umunyamakuru w’umurundi

Chief Editor | 8-08-2016
Habonetse umurambo bikekwa ko ari uw’umunyamakuru w’umurundi

Mu mugezi uri hafi ya Bugarama, mu gace umunyamakuru w’Umurundi Jean Bigirimana aheruka kubonekamo tariki 22 Nyakanga 2016, habonetse umurambo bikekwa ko ari we waba warishwe akajugunywa. Ni nyuma y’igihe ikinyamakuru Iwacu uyu munyamakuru yakoreraga gishakisha amanywa n’ijoro irengero rye.

Kuri iki Cyumweru tariki 7 Kanama 2016, nibwo uyu murambo wabonetse. Ubucukumbuzi bwakozwe n’Ikinyamakuru Iwacu uyu munyamakuru Jean Bigirimana yakoreraga, bugaragaza ko uyu murambo wabonetse mu mugezi wa Mubarazi uri hafi y’ikibaya cya Bugarama, aka gace bikaba bivugwa ko ari ko yafatiwemo n’imodoka y’ibiro bishinzwe iperereza mu Burundi tariki 22 Nyakanga 2016.

Kuva Jean Bigirimana yabura, ikipe y’abanyamakuru b’ikinyamakuru yakoreraga ntibahwemye gushakisha amanywa n’ijoro, hagaragazwa ko ibiro bishinzwe iperereza mu Burundi byaba ari byo bimubitse, ndetse haza no kugaragazazwa ko yigeze gukubitwa bikomeye n’abashinzwe umutekano bo muri ibi biro by’iperereza.

Nyuma y’igihe aba banyamakuru bashakisha bonyine, kuwa Gatandatu w’iki cyumweru dusoje nibwo batangiye gufatanya n’izindi nzego zirimo abanyamakuru b’ibindi bitangazamakuru byo mu Burundi, Polisi y’iki gihugu, ibiro bishinzwe iperereza na Komisiyo yigenga ishinzwe kurengera uburenganzira bwa muntu, ariko uwo munsi ntacyo bigeze bageraho.

Ku cyumweru abanyamakuru bakomeje gushakisha bonyine, baza kubona bimwe mu byatumye batekereza ko byaba ari ibimenyetso simusiga by’irengero rya Jean Bigirimana. Icyo si ikindi, ni umurambo wabonetse mu gace bakekagamo irengero rye, gusa kuba warangiritse byatumye kugeza ubu bitondera guhamya ijana ku ijana ko ari we.

Polisi y’u Burundi itarigeze ishyira umuhate mu kumushakisha, yo ivuga ko yabujije abanyamakuru ba Iwacu gutangaza ibyavuye mu bushakashatsi bakoze, ahubwo bakabiyishyikiriza nayo igakomeza iperereza, ibi bikaba ari ukubavangira ari nayo mpamvu yabaretse.

KANDA HANO UREBE VIDEOS UTASANGA AHANDI