Imodoka ya Jaguar yavaga i Kigali ijyanye abagenzi i Kampala yakoze impanuka

Chief Editor | 30-06-2016
Imodoka ya Jaguar yavaga i Kigali ijyanye abagenzi i Kampala yakoze impanuka

Mu gace k’ubucuruzi kitwa Kyazanga muri Masaka mu gihugu cya Uganda, habereye impanuka y’imodoka nini itwara abagenzi ya kompanyi ya Jaguar, abantu babiri bahita bashiramo umwuka. Iyi mpanuka yabaye mu masaha y’urukerera rwo kuri uyu wa Kane.

Iyi modoka ya Jaguar yavaga i Kigali ijya i Kampala, yagonganye n’ikamyo yari yikoreye ibitoki nk’uko byemejwe na Polly Namaye, umuvugizi wungirije wa Polisi ya Uganda, mu kiganiro yagiranye n’ikinyamakuru Daily Monitor cyo muri Uganda.

Uyu muvugizi wa Polisi yavuze ko abapfuye ari Nathan Kabigumira ukomoka ahitwa Biharwe ndetse n’umuvugabutumwa witwa Kyokunzire w’ahitwa Rwabagaga mu gihugu cya Uganda.

Umushoferi wari utwaye ikamyo y’ibitoki witwa John Bosco Kisseka we yakomeretse bikomeye ajyanwa mu bitaro bya Lyantonde mu gihe uwari utwaye imodoka ya Jaguar binakekwa ko ari umunyarwanda we yahise atoroka akaba ashakishwa na Polisi kuko ari we wakoze amakosa yatumye impanuka iba.

KANDA HANO UREBE VIDEOS UTASANGA AHANDI