Intagondwa za Boko Haram zagabye ibitero ku modoka z’Umuryango w’Abibumbye

Bikorimana Alexis | 30-07-2016
Intagondwa za Boko Haram zagabye ibitero  ku modoka z’Umuryango w’Abibumbye

Imodoka za UN ziherekejwe n’igisirikare, zaguwe gitumo n’abarwanyi ba Boko Haram ubwo bajyanaga imfashanyo mu gace ka Borno muri Nigeria.

Umuryango w’abibumbye (UN) wari umaze igihe ufasha abaturage ba Nigeria bakuwe mu twabo n’uyu mutwe w’iterabwoba ukorera muri iki gihugu cya Nigeria.

Ibi bikimara kuba, uyu muryango wahise ufata umwanzuro wo kuba uhagaritse inkunga wageneraga abaturage bo mu gace ka Borno nyuma yo kubona ko ako gace kakibarizwamo ibyihebe ndetse kibasiwe n’intambara.

Iki gitero cya Boko Haram cyakomerekeyemo abaturage, abakozi ba UN ndetse n’abasirikare 3 nk’uko bitangazwa n’igisirikare cya Nigeria.

Muri icyi gihugu, abantu basaga miliyoni 2 bamaze kuva mu byabo kubera umutekano mucye uterwa n’imitwe y’iterabwoba cyane cyane Boko Haram nk’uko BBC dukesha iyi nkuru ikomeza ibitangaza.

Umuryango w’abibumbye utangaza ko abana ibihumbi n’ibihumbi bamaze guhitanwa n’indwara ziterwa n’imiririre mibi cyane cyane igaragara mu gace ka Borno kabarizwamo impunzi.

Agashami ka UN gashinzwe kwita ku bana, mu ntangiriro z’uku kwezi katangaje ko abana bagera ku bihumbi icumi (10000) bashobora gupfa igihe haba hatabonetse umuti mu maguru mashya.

Kuva uyu mutwe wakibasira Nigeria, watumye abaturage basaga 20000 bapfa naho abana bagera ku 250000 ubu bakaba bibasiwe n’indwara ziterwa n’imirire mibi.

KANDA HANO UREBE VIDEOS UTASANGA AHANDI