Inzu ya Kizza Besigye utavuga rumwe n’ubutegetsi bwa Museveni, yatewe

Chief Editor | 6-06-2016
Inzu ya Kizza Besigye utavuga rumwe n’ubutegetsi bwa Museveni, yatewe

Polisi yo mu karere ka Rukungiri muri Uganda, irimo gukora iperereza ku mugambi w’umugabo watawe muri yombi nyuma yo gufatwa asenya inzu ya Dr Kizza Besigye wafunzwe mu minsi ishize ashinjwa kugambanira igihugu no kukibuza umudendezo.

Ikinyamakuru Daily Minitor, kivuga ko uwatawe muri yombi ari umusore w’imyaka 20, akaba yarafashwe mu ijoro ryo kuwa Gatandatu tariki 4 Kamena 2016, nyuma yo gucagagura insinga z’umuriro no kumena ikirahure cy’urugi rw’umuryango w’inzu ya Besigye.

Umuyobozi wa Polisi muri ako karere, Mr Ronald Wotwali, yavuze ko batabajwe n’uwarindaga urwo rugo bagahita bata muri yombi uwasenyaga inzu y’uyu mugabo utavuga rumwe na Perezida Museveni, aboneraho kuvuga ko uwatawe muri yombi basanze afite uburwayi bwo mu mutwe ariko bikaba bikirimo gukorwaho iperereza.

Abayoboke b’itorero rya Christ The King riri hafi y’aho ibi byabereye, bavuga ko uwo musore wafashwe bamuzi ndetse yanacurangiraga korali mu rusengero, gusa mu cyumweru gishize bakaba bari bamuburiye irengero.

Kemigisa wabaga muri iyi nzu ari nawe wayirindaga, yasabye Polisi ko hakorwa iperereza ryimbitse ngo hamenyekane niba nta kindi kibyihishe inyuma, kuko bishoboka ko hari uwaba yari yamutumye.

Avuga ko uyu musore yasimbutse igipangu akagwamo imbere, yarangiza agafungura amazi agasiga ameneka, ubundi akinjira ahafatirwa umuriro w’amashanyarazi agacagarura insinga, agakomeza akangiza n’umuriro ukomoka ku mirasire y’izuba, akabona kujya kumenagura ibirahure by’inzugi ariko agahita afatwa.

KANDA HANO UREBE VIDEOS UTASANGA AHANDI