Tanzania: Umutingito wahitanye abatari bacye unangiza byinshi -Amafoto

Rukundo Irené | 11-09-2016
Tanzania: Umutingito wahitanye abatari bacye unangiza byinshi -Amafoto

Ahagana ku isaha ya saa cyenda n’iminota makumyabiri n’irindwi kuri uyu wa Gatandatu tariki 10 Nzeri 2016, umutingito uri ku gipimo cya 5.7 Richter wibasiye amajyaruguru ya Tanzaniya wegereye ku kiyaga cya Victoria, wasize wangirije byinshi cyane ndetse abagera ku 13 bahasiga ubuzima abandi 203 barahakomerekera.

Uyu mutingito n’ubwo ahantu hanini wibasiye ari mu majyaruguru ya Tanzania ariko wafashe no mu bindi bihugu bihegereye harimo u Rwanda, u Burundi, Kenya ndetse na Uganda. Nk’uko amafoto yagiye abigaragaza nyuma y’uko uyu mutingito urangira, mu gace ka Bukoba ari naho hibasiriwe cyane hagiye hagaragara amazu menshi yangiritse ndetse hakaba ari ho habonetse inkomere nyinshi.

Umuyobozi uyobora aka karere ka Bukoba ubwo yaganiraga na BBC yavuze ko uyu mutingito wangije ibintu byinshi ku buryo uko igihe kigenda gihita, ibyangiritse bishobora gukomeza kwiyongera.

Yagize ati: "Ibi byabaye byateje ukwangirika kw’ibintu byinshi. Ubu tuvugana umubare w’abakomeretse ni 203 naho 13 bapfuye. Kuko tugikomeje gukusanya amakuru, biragaragara ko umubare ushobora kuza gukomeza kwiyongera."

N’ubwo uyu mutingito wageze mu Rwanda, Minisiteri ifite mu nshingano zayo gukumira ibiza no kugoboka abibasiwe nabyo, ntacyo yigeze itangaza cyaba cyarangijwe n’uyu mutingito.

Uretse abantu bapfuye n’abakomeretse, muri Tanzania umutingito wanangije byinshi

KANDA HANO UREBE VIDEOS UTASANGA AHANDI