Umusore w’imyaka 19 yishe umugore anakomeretsa abandi bantu akoreshejye icyuma

Paola Abizera | 4-08-2016
Umusore w’imyaka 19 yishe umugore anakomeretsa abandi  bantu akoreshejye icyuma

Polisi yo mu gihugu cy’u Bwongereza yatangaje ko umusore w’imyaka 19 bikekwa ko afite uburwayi bwo mu mutwe yishe umunyamerikakazi akanakomeretsa abandi bantu akoresheje icyuma, ibi bikaba byabereye mu mujyi wa London. Mu bakomeretse harimo abafite ubwenegihugu bwo muri Australia, America, Israel ndetse n’u Bwongereza.

Umuyobozi wa Polisi witwa Mark Rowley yabwiye itangazamakuru ko Polisi yahamagawe mu ma saha ya saa yine n’igice z’ijoro nyuma y’uko uwo muntu atangiye kurwanya abantu akoresheje icyuma ahantu bita Russell Square, hegereye cyane aho abiyahuzi baturikije ibisasu muri 2005 ndetse n’inzu ndangamurage y’u Bwongereza.

Rowley yavuze ko basanze abantu batandatu bamaze guterwa ibyuma, biba ngombwa ko bakoresha akuma gakoresha amashanyarazi kugirango bafate uwo musore kuri ubu ukurikiranweho icyaha cyo kwica umuntu. Uwitabye Imana yari ari mu kigero cy’imyaka 60, abandi bagabo bane ndetse n’umugore umwe bajyanywe kwa muganga nyuma yo gukomereka.

Polisi kandi yavuze ko ntacyerekana ko uyu musore ufite inkomoko mu gihugu cya Somalia ariko akaba afite ubwenegihugu bwa Norway, yaba afite aho ahuriye n’abakora iterabwoba. Rowley yagize ati ”Kugeza ubu akazi tumaze gukora kerekana ko ibi bifite aho bihuriye n’uburwayi bwo mu mutwe, ntacyerekana ko iki ari igitero cy’iterabwoba, turatekereza ko ari ibintu yakoze ahubutse kandi abo yahisemo kugirira nabi ntacyo bapfaga”.

KANDA HANO UREBE VIDEOS UTASANGA AHANDI