Umusore yapfuye bitunguranye mbere gato y’ubukwe bwe, ibyari ibirori bihinduka ikiriyo

Chief Editor | 14-05-2016
Umusore yapfuye bitunguranye mbere gato y’ubukwe bwe, ibyari ibirori bihinduka ikiriyo

Mu gihe umusore n’umugeni we biteguraga kwambikana impeta kuri uyu wa Gatandatu bagakora ibirori by’ubukwe bwabo imbere y’inshuti n’imiryango, umusore yaje gupfa maze ibyari imyiteguro y’ubukwe bihinduka ikiriyo.

Stephen Mugalya w’imyaka 30 y’amavuko, yagombaga gusezerana na Sarah Katooko w’imyaka 24 y’amavuko, mu birori by’ubukwe bwabo bwagombaga kuba kuri uyu wa Gatandatu tariki 14 Gicurasi 2016. Ubu bukwe bwabo, bwagombaga kubera mu gace kitwa Bulalaka mu karere ka Budaka mu gihugu cya Uganda.

Mu gihe imyiteguro yari igeze kure inshuti n’imiryango bashyashyana ngo ubukwe buzagende neza, inkuru y’incamugongo yageze ku nshuti n’abavandimwe ivuga ko Stephen Mugalya apfuye azize urusinga rw’amashanyarazi yanyuzeho ubwo yari mu nzira ava ku rusengero, aho yari yagiye kubonana na pasiteri wagombaga kubasezeranya.

Ikibazo cy’insinga z’umuriro w’amashanyarazi kirahangayikishije muri iki gihugu cya Uganda, dore ko kuwa Kane nabwo undi mugabo w’imyaka 29 witwaga Francis Mwidu, nawe yafatiwe n’umuriro mu gace uriya musore yaguyemo, akajyanwa mu bitaro igitaraganya. Hari hashize icyumweru kandi undi mwana w’imyaka itatu nawe apfuye muri ubu buryo nk’uko Daily Monitor ibitangaza.

KANDA HANO UREBE VIDEOS UTASANGA AHANDI