Umwarimu ukomoka muri Kongo yishwe atewe amabuye mu Buhinde

Chief Editor | 23-05-2016
Umwarimu ukomoka muri Kongo yishwe atewe amabuye mu Buhinde

Umusore ukomoka muri Repubulika Iharanira Demokarasi ya Kongo wigishaga mu Buhinde, yicishijwe amabuye n’amatafari yaterewe mu mujyi wa New Delhi mu mpera z’iki cyumweru dusoje, kubera ivanguraruhu rikunze kwibasira abanyafurika baba muri iki gihugu.

Ibiro ntaramakuru by’Abafaransa AFP, bivuga ko Polisi y’u Buhinde yemeye iby’aya makuru kuwa Gatandatu w’iki cyumweru gishize, igasobanura ko uyu musore w’imyaka 23 ukomoka muri Kongo yiciwe mu gace ka Vasant Kunj atewe amabuye kuwa Gatanu tariki 20 Gicurasi 2016.

Polisi y’u Buhinde ivuga ko uretse uyu watewe amabuye bikamuviramo gupfa, hari n’undi wakubiswe cyane ubwo yageragezaga gutabara nyakwigendera. Polisi ariko ihakana amakuru avuga ko ibi byakuruwe n’ivangura rishingiye ku ruhu rikunze kuranga abahinde ahanini bibasira abirabura.

Ibikorwa byibasira abanyafurika, bikunze kuba byinshi mu Buhinde kandi akenshi biba bishingiye ku ivanguraruhu. Muri 2013, umuturage ukomoka muri Nigeria yiciwe muri iki gihugu, nyuma y’uko bamwe mu banyapolitiki bari bagereranyije abanyafurika n’icyorezo cya kanseri, bagasaba ko birukanwa ndetse abaturage bamwe b’abahinde bagategekwa kudaha abanyafurika inzu bakodesha.

Muri uwo mwaka kandi, umunyeshuri w’imyaka 21 ukomoka muri Tanzania yari yibasiwe hamwe n’inshuti ze, batwikirwa imodoka yabo, barabakubita ndetse uwo munyeshuri w’umukobwa bamwambura imyenda yari yambaye.

Muri 2014, Minisitiri ushinzwe imiturire muri New Delhi, yabwiye abapolisi kujya gutera agace gatuwe cyane mu murwa mukuru, bagateza akaduruvayo mu bakobwa b’abanyafurikakazi yitaga ko ari indaya.

KANDA HANO UREBE VIDEOS UTASANGA AHANDI