Ibitero bya gerenade bikomeje kwisukiranya i Bujumbura, bihitana bamwe bigakomeretsa benshi

Chief Editor | 9-05-2016
Ibitero bya gerenade bikomeje kwisukiranya i Bujumbura, bihitana bamwe bigakomeretsa benshi

Abantu batatu nibo bapfuye hakomereka abarenga 20, mu bitero bya gerenade bikomeje kwisukiranya i Bujumbura mu murwa mukuru w’igihugu cy’u Burundi guhera kuwa Gatanu w’icyumweru gishize.

Kuri iki Cyumweru tariki 8 Gicurasi 2016, mu masaha ya saa tatu z’ijoro, umuntu umwe yarishwe naho abandi batanu barakomereka barimo umwe wangiritse cyane, nyuma yo kwibasirwa n’igitero cya gerenade cyabasanze mu kabari k’ahitwa Bwiza, agace kabamo abantu benshi cyane mu mujyi wa Bujumbura.

Kuwa Gatandatu tariki 7 Gicurasi, indi gerenade yari yatewe mu gasoko gato k’ahitwa Buterere, hari mu masaha ya saa moya z’umugoroba. Icyo gitero cya gerenade nacyo cyahitanye umuntu umwe wacuruzaga muri ako gasoko, hanyuma abantu 12 barakomereka, barimo babiri bakomeretse bikomeye nk’uko Jeune Afrique ibitangaza.

Umugore umwe kandi yari yishwe kuwa Gatanu, mu gihe abantu umunani bakomeretse barimo bane bakomeretse bikomeye mu gitero cya gerenade cyatewe mu gace kitwa Kinama, mu majyaruguru y’umujyi wa Bujumbura, ibi byose bikaba bikomeje gutera ubwoba abaturage, kuko kuva kuwa Gatanu nta munsi ushira hadatewe gerenade.

Umuyobozi w’umujyi wa Bujumbura; Freddy Mbonimpa, kuri uyu wa mbere nibwo yemeje amakuru y’ibi bitero, avuga ko ari ibikorwa by’iterabwoba byibasira ubuzima bw’abaturage b’u Burundi. Avuga ko ibi bitero bigamije gukura umutima abaturage bari bamaze kwibonera umutuzo, gusa ngo bakaba barimo gufatanya n’abaturage gushaka uko babihashya.

KANDA HANO UREBE VIDEOS UTASANGA AHANDI