Abanyarwanda batangiye gutaka ingaruka batewe n’icyemezo cyafashwe n’u Burundi

Chief Editor | 18-08-2016
Abanyarwanda batangiye gutaka ingaruka batewe n’icyemezo cyafashwe n’u Burundi

Icyemezo u Burundi buherutse gufata cyo guhagarika ibikorwa by’ubucuruzi n’u Rwanda, cyatangiye kugira ingaruka bamwe mu banyarwanda babona ko zishobora kuzabazahaza, gusa si rw’umwe kuko n’Abarundi barira ayo kwarika.

Ubwo yari mu muganda rusange kuwa Gatandatu tariki 30 Nyakanga 2016 muri komine Rugombo mu ntara ya Cibitoke, icyegera cya kabiri cya Perezida w’u Burundi, Joseph Butore, yatangaje ku mugaragaro ko nta gicuruzwa kizongera kuva mu gihugu cye kinjira mu Rwanda, impamvu y’icyo cyemezo ikaba ifitanye isano n’ibyo u Burundi bushinja u Rwanda byo gufasha no gushyigikira abahungabanya umutekano mu Burundi.

Joseph Butore yabwiye abashinzwe umutekano ko uzibeshya akarenga kuri icyo cyemezo azahura n’ingorane zikomeye, kuko asanga nta mpamvu yo gukomeza kohereza ibucuruzwa birimo ibiribwa mu gihugu kirwanya u Burundi.

Ibi ariko byagize ingaruka zikomeye ku bihugu byombi mu buryo bugaragara nk’uko abaturage ubwabo babigaragaza. Mu masoko atandukanye yo hirya no hino mu mujyi wa Kigali, usanga bimwe mu bicuruzwa byaturukaga i Burundi byarazamutse cyane, aho ubu ikilo kimwe cy’indagara z’indundi kigeze ku mafaranga y’u Rwanda 9.000 aho kuba 6.000 nk’uko byagendaga muri Kanama, mu gihe zimwe mu mbuto zaturukaga muri iki gihugu nazo zigenda zizamuka. Si uguhenda gusa ariko kuko ibi bicuruzwa binabura hamwe na hamwe ku masoko, nk’abagifite indagara z’indundi bakaba ari abaziranguye mbere y’icyemezo cyafashwe n’u Burundi.

Umwe mu bacururiza mu isoko rya Kimironko, aganira na BBC yagize ati: “Ubu umuntu yavuga ko indagara zihenze cyane kuko ubusanzwe mu kwezi kwa munani, indagara zi Burundi ziba zatangiye kuboneka ari nyinshi bityo igiciro cyazo kikagabanuka. Ariko ubu ntibizashoboka kubera iki kibazo cyabaye i Burundi. Nibaza ko ibintu nibikomeza gutya bizarushaho kuba bibi cyane tukazibura burundu. Abaguzi benshi baza bishakira indagara z’i Burundi. Izi ndagara ni zo zituma n’izituruka ahandi zigurishwa, iyo iz’i Burundi zidahari usanga kugurisha iz’ahandi bitugora cyane”.

Ku rundi ruhande ariko, abaturage b’i Burundi nabo bavuga ko bashegeshwe cyane n’iki cyemezo, bakaba baraguye mu gihombo gikabije. Mu isoko rya Rugombo n’irya Cibitoke, mu minsi ishize abacuruzi baho batakaga ko ibicuruzwa birimo nk’inyanya, ibitunguru n’izindi mboga byatangiye kwangirika, kuko kuva iki cyemezo cyafatwa babuze abaguzi, kandi mbere barabyambutsaga mu Rwanda bagahabwa amafaranga atubutse. Ku mupaka wa Ruhwa, abacuruzi b’Abarundi n’Abanyarwanda bemeza ko iki cyemezo cyazahaje ubuhahirane.

Abacuruzi b’Abarundi bavuga ko bafite impungenge zo kunanirwa kwishyura inguzanyo bafashe mu ma banki n’ibigo by’imari, kuko igishoro cyabo gikomeje kwangirika babireba n’icyizere cyo kubona inyungu kikaba cyarayoyotse.

KANDA HANO UREBE VIDEOS UTASANGA AHANDI