Abanyarwandakazi babiri gusa nibo bemerewe gukuramo inda ku bushake

Chief Editor | 23-06-2016
Abanyarwandakazi babiri gusa nibo bemerewe gukuramo inda ku bushake

Nyuma y’imyaka ine mu Rwanda hemejwe itegeko riteganya ko umugore ashobora gukuramo inda ku bushake ariko hagashyirwaho n’ibigenderwaho, abagore babiri gusa nibo bamaze kugobokwa n’iri tegeko, mu gihe umunsi ku wundi humvikana ababyaye abana bakabata cyangwa bagakuriramo inda ahantu hatemewe hashobora no kubahitana.

Mu mezi atangira umwaka wa 2012, habaye impaka ndende ku birebana n’umushinga w’itegeko rirebana no gukuramo inda ku mpamvu zimwe na zimwe, ariko biza kurangira impaka zimazwe n’uko iryo tegeko ryaje kwemerwa ndetse rigasinywa na Perezida wa Repubulika y’u Rwanda Paul Kagame.

Ingingo ya 165 y’itegeko kugeza n’ubu rigaragara mu itegeko ngenga rishyiraho igitabo cy’amategeko ahana N° 01/2012/OL ryo kuwa 02/05/2012 cyasohotse mu igazeti ya Leta nº Special yo kuwa 14 Kamena 2012, yemera ko hari impamvu zishobora gutuma umugore yemererwa gukuramo inda ndetse n’umuganga akemera kuyimukuriramo.

Ingingo ya 165 mu gitabo cy’amategeko ahana ibyaha mu Rwanda ivuga ko nta buryozwacyaha ku mugore no ku muganga wakuyemo inda bitewe n’imwe mu mpamvu zirimo kuba umugore yatwaye inda atayishaka kubera gukoreshwa imibonano mpuzabitsina ku ngufu; kuba yarashyingiwe ku ngufu; kuba yatewe inda n’uwo bafitanye isano ya hafi kugera ku gisanira cya kabiri; kuba inda itwiswe ibangamiye cyane ubuzima bw’umwana cyangwa ubw’umubyeyi.

Nyamara iyi ngingo ivuga ko uretse mu gihe inda ibangamiye cyane ubuzima bw’umwana cyangwa ubw’umubyeyi, izindi mpamvu zihabwa agaciro gusa iyo nyir’ugusaba gukurwamo inda yagaragarije muganga icyemezo cy’urukiko rubifitiye ububasha kibyemeza.

Iyi ngingo kandi inavuga ko Urukiko rushyikirijwe ikirego ruhagarika indi mirimo rukagisuzuma kandi rukagifatira umwanzuro mu buryo bwihutirwa.

Nyamara kuva iri tegeko ryakwemezwa, amakuru atangazwa n’ikigo cy’igihugu cy’Ubuzima (RBC), avuga ko abagore babiri gusa ari bo bemerewe gukurirwamo inda, bitewe ahanini n’imbogamizi ababa babishaka bahura nazo, zirimo kuba inda imaze amezi arenze abiri n’igice bitemewe ko yakurwamo kandi ibyemezo by’inkiko bikunda gutinda.

Abaharanira uburenganzira bwa muntu, bavuga ko n’ubwo u Rwanda rwita ku burenganzira bw’abagore, ikijyanye no koroherezwa gukuramo inda zitifuzwa ari imbogamizi kuko bamwe bazikuriramo ahantu zishobora kubahitana cyangwa babyara abana bakabajugunya.

KANDA HANO UREBE VIDEOS UTASANGA AHANDI