Ahimana Celestin umaze imyaka irenga ine mu bitaro, aratakambira abafite umutima w’impuhwe

Chief Editor | 16-05-2016
Ahimana Celestin umaze imyaka irenga ine mu bitaro, aratakambira abafite umutima w’impuhwe

Ahimana Céléstin ni umusore ukiri muto wahuye n’akaga gakomeye ubwo yari arangije amashuri yisumbuye, yitegura gukomereza muri Kaminuza. Yakoze impanuka ubwo yari iwabo mu rugo, bimuviramo kuvunika ijosi, bimutera ibibazo by’ubuzima byatumye kugeza ubu amaze imyaka irenga 4 mu bitaro.

Ahimana Céléstin ni umusore ukomoka mu murenge wa Karangazi wo karere ka Nyagatare, aho benshi bakunda kwita mu Mutara. Mu mwaka wa 2012, ubwo yari arimo gukora imirimo yo mu rugo, yikoreye ifumbire agiye kuyimena mu murimo, aratsikira aragwa, bimuviramo kuvunika ijosi.

Yivurije mu bitaro bya Nemba mu karere ka Gakenke, ajya mu bitaro bya CHUK ndetse ajya no mu bitaro by’inkomerere bya Nyagatare, ari naho amaze igihe kirekire aryamye kuko ahamaze imyaka itatu n’amezi atatu, ariko igihe cyose amaze mu bitaro kikaba gikabakaba imyaka 4 n’amezi atanu.

Mu kiganiro n’ikinyamakuru Ukwezi.com, uyu musore yashimangiye ko yahuye n’akaga gakomeye, nyuma yo kuvunika ijosi bakamushyiraho igisima ngo amagufwa yongere gufatana neza, ariko nyuma bikaba byaragaragaye ko amagufwa atahuye neza ahubwo hagafatana amagufwa ataringaniye, ari nabyo byatumye igice cyo hasi cyose kigagara, ibi bikaba byararushijeho kumukomerera.

Kumara imyaka yose aryamye ku gitanda ndetse no kuba igice cyo hasi cy’umubiri we cyaragagaye, byatumye Ahimana anahura n’ikibazo cy’uko umugongo wabaye ibisebe, ibi byose bikaba byaramuzahaje kandi kuba umuryango we umaze kuzahara mu by’ubukungu kubera amafaranga menshi bamutanzeho, bituma atakaza icyizere cyo kuzakira kuko n’ubu aho aryamye hari ubuvuzi atabonye kuko yabuze ubushobozi.

Ahimana yabwiye Ukwezi.com ko hari umuganga wo mu Buhinde bavuganye, akamusaba ikizamini yari akeneye ngo abashe kugiheraho amubwira niba mu Buhinde babasha kumuvura agakira burundu, ariko ngo yabuze amafaranga y’u Rwanda ibihumbi magana abiri na mirongo itanu (250.000) asabwa ngo icyo kizamini gikorwe. Asaba umugiraneza wese ufite umutima utabara, ko yamugoboka akabasha kubona ubushobozi bwo gukoresha icyo kizamini.

Ku muntu wese ufite umutima w’urukundo n’impuhwe wakwifuza kugira ubufasha bwose aha uyu musore, yamusanga mu bitaro bya Nyagatare cyangwa akamuhamagara kuri 0782124301 cyangwa 0722124301, cyangwa nanone agahamagara umurwaza we kuri 0722271047

NB: Gusangiza iyi nkuru abantu benshi bashoboka ukoresheje imbuga nkoranyambaga, nabwo ni ubufasha bukomeye mu kumukorere ubuvugizi.

KANDA HANO UREBE VIDEOS UTASANGA AHANDI