AMAKURU

UKWEZI

Amateka n’inkomoko y’urutare rwa Kamegeri n’isomo rikomeye ukwiye kubikuramo

Amateka n’inkomoko y’urutare rwa Kamegeri n’isomo rikomeye ukwiye kubikuramo
14-09-2016 | By Chief Editor | Yasomwe n'abantu 3711 | Ibitekerezo 5

Urutare rwa Kamegeri, ruherereye mu karere ka Ruhango mu murenge wa Ruhango munsi y’umuhanda uri hagati y’umujyi wa Ruhango n’ahahoze ibiro bya Komini Kigoma. Uru tutare ruri mu byiza nyaburanga benshi bakunda gusura bakihera ijisho, rufite amateka akwiye kubera benshi isomo mu buzima bwabo bwa buri munsi nk’uko bigaragara muri iyi nkuru Ikinyamakuru Ukwezi.com cyabateguriye.

Uru rutare rwitiriwe umugabo witwaga Kamegeri, akaba yararuboneyeho akaga yashakaga kugushamo abandi, bihita biba aka ya mvugo y’umugani nyarwanda bagira bati: "Urucira mukaso rugatwara nyoko". Hari ibitabo bimwe bigaruka kuri aya mateka, aho usanga bamwita "Kagemeri" ariko izina nyaryo ni Kamegeri.

Kamegeri uyu yari umutware ku ngoma y’umwami Mibambwe II Sekarongoro II Gisanura, ahagana mu mwaka w’1672. Kamegeri yitiriwe uru rutare, nyuma y’uko barumutwikiyeho, ibyo bikaba byarabayeho ku itegeko ry’umwami Mibambwe II Sekarongoro II Gisanura, ibi akaba yarabyifuje nyuma y’aho Kamegeri yari yabwiye umwami ko abazajya bagira nabi bazajya barujugunywaho rumaze gucanirwa.

GIF - 922 kb

Uyu mwami Mibambwe II Sekarongoro II Gisanura, yari azwiho ubwitonzi, kugira ubuntu, guha amata abakene begereye ibwami no kwanga akarengane. Ibyo byatumye bamuhimba igisingizo bamwita “Rugabishabirenge” kuko yatangaga atitangiye itama. Yari azwiho kandi kuba umucamanza utabera kandi wangaga ko hatangwa ibihano bidakwiye umuntu.

Umunsi umwe, Mibambwe II Sekarongoro II Gisanura, yabajije abatware be igihano gisumba ibindi bumva umuntu mubi cyane mu gihugu yajya ahabwa , buri wese muri abo batware agenda avuga icye. Umwami yumvise hari abatware bifuriza rubanda ibihano birimo ubugome, maze asanze bikabije buri wese amuhanisha icyo yagiye avuga.

Umutware witwaga Kamegeri, we yari yavuze ko igihano cyiza ari ugusambura inzu ziri hafi aho, bagacaniriza urutare iyo sakamburiro kugeza aho urutare rutukura, noneho umuntu w’umugome bakarumushyiraho agashirira. Umwami nyuma yo gutekereza kuri icyo gihano, yasanze nta muntu mubi (w’umugome) kurusha Kamegeri. Nuko aca iteka ko uwo Kamegeri bamuhanisha icyo gihano kibi yahimbiye abandi, noneho baramuboha bamujugunya ari muzima ku rutare bacaniriye rwatukuye nk’uko yabyifurizaga abandi.

Burya koko ngo umwami ntiyica, hica abamuhuza na rubanda kandi nabo ari rubanda! Mu buzima busanzwe, hari ubwo abantu usanga bifuriza abandi ibibi nk’uko Kamegeri yabikoze, ibyo bikaba byabatera kugambanira abandi, kubateranya ku bayobozi cyangwa abandi babakuriye, bakifuza ko ikibi cyaba ku bandi. Ibi ariko abateye batyo bakwiye kubyitondera, bakamenya ko hari ubwo ikibi wifuriza abandi nawe gishobora kukugeraho.

Ku bemera Imana, kwifuriza abandi ibibi bikuzanira umuvumo ariko kwifuza ko na mugenzi wawe yagira umugisha akagira amahoro n’iterambere, ibyo ubwabyo ni byiza kuri wowe kuko bikuzanira imigisha. Ntabwo kugirira ishyari umuntu ku bw’umugisha afite bizatuma umugisha we uba uwawe, ahubwo bishobora kuzakwambura n’umugisha wowe wari wisanganiwe.


Tanga Igitekerezo
Ibitekerezo 5
Rukamirwa Kuya 18-09-2016

muzadutohereze niba uwo kamegeri afitanye isano nabanyamurenge bakomoka kumuntu witwa kamegeri wo mubwoko bwabasita

Dada Kuya 18-09-2016

Mukomere

uk Kuya 15-09-2016

Ariko jye ,ndabona uyu Kamegel,yararenganye, kera nkibyumva narinzi ko hari uwo yari yarakatiye icyo gihano , naho niba yarazize proposal kabisa yararenganye. Umwami yifashishije abajyanama be yagombaga kureba propositions z’ibihano zatanzwe n’abatware banyuranye (harimo n’icyatanzwe na Kamegeli ), agahitamo igihano gikwiye umuntu wakoze icyaha gikomeye.

simple Kuya 14-09-2016

Denis ko waba uri intashima Nina iki kinyamakuru ukigereranya na bimwe biduha inkuru zitagira intangiriro niherezo koko! Ukwezi muklmerezeho pe! Mvuze ko ntacyo mukora naba nkosheje ngereranyije nurugero nkiyo ndi mumodoka cg mur cyber abantu mbona bari interested munkuru zanyu. Courage pe

Denis Kuya 14-09-2016

Mwabera none ho muvuze akantu kazima pe, Murakoze cyane

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA