Claire Gasamagera amaze kwamamara nyuma y’imyaka 33 abana n’ubwandu bwa SIDA

Chief Editor | 18-09-2016
Claire Gasamagera amaze kwamamara nyuma y’imyaka 33 abana n’ubwandu bwa SIDA

Claire Gasamagera ni umunyarwandakazi w’imyaka 33 y’amavuko uherutse gushyirwa ku rutonde rw’abantu 100 bamaze igihe kirekire babana n’ubwandu bw’agakoko gatera SIDA baba muri Leta Zunze Ubumwe za Amerika, dore ko yayivukanye kandi kugeza n’ubu ubuzima bwe bukaba bwifashe neza. Ibikorwa akora n’ubukangurambaga, bimaze gutuma aba icyamamare ku isi.

Claire Gasamagera yavutse tariki 8 Kamena 1983, avukana ubwandu bwa SIDA yandujwe n’ababyeyi be. Ababyeyi be baje kuvumbura ko yavukanye SIDA ubwo yari umwana w’imyaka 5 y’amavuko, ndetse icyo gihe ninabwo nyina yapfuye ahitanywe n’iki cyorezo. Se yahise ashaka undi mugore ariko ubwo Claire Gasamagera yari afite imyaka 14 y’amavuko, uyu se nawe yaje gupfa amusigira mukase wagombaga kumwitaho hamwe n’abandi bakobwa batatu bavukanaga.

JPEG - 145.7 kb

Ubwo Claire Gasamagera yari afite imyaka 17, mukase nawe yaje gupfa maze asigarana inshingano zo kurera abavandimwe be kuko nta bandi bo mu muryango bari kubitaho. N’ubwo yari amaranye igihe kirekire agakoko gatera SIDA, gukoresha imiti igabanya ubukana byamufashije gukomeza amashuri ye, yiga abanza ku kigo cya EPA Primary School ndetse ayisumbuye ayakomereza muri Lycee Notre Dame de Citeau. Yaje gukomereza Kaminuza mu cyahoze ari Ishuri Rikuru ry’Ubumenyi n’Ikoranabuhanga (KIST).

Muri iyi Kaminuza yizemo ibijyanye n’ubumenyi mu by’ibiribwa (Food Science), nyamara yarangije amashuri yisumbuye yifuza kuziga ubuvuzi kuko zari indoto ze kuva mu buto, ariko n’ubwo yari afite amanota meza, yangiwe kwiga iby’ubuvuzi kubera uburwayi bwe, ibi bikaba byaramubabaje cyane akumva ko yarenganyijwe.

Ubwo yarangizaga icyiciro cya kabiri cya Kaminuza mu mwaka wa 2007, yateguriwe ibirori by’akataraboneka n’abaganga, kuko yari abaye umunyeshuri wa mbere urangije Kaminuza yaravukanye ubwandu bwa SIDA. Uyu munsi avuga ko wabaye uw’ibyishimo bihebuje mu buzima bwe.

JPEG - 175.1 kb

Nyuma yo kurangiza Kaminuza, Gasamagera yagiye ahura n’ibibazo byo kubura akazi, kuko rimwe yatsindaga ibizamini by’akazi ariko kubera gusabwa icyemezo cya muganga wemewe na Leta, agahakanirwa akazi bitewe n’uburwayi bwe. Avuga ko yabwirwaga ko umuntu ubana n’ubwandu bwa SIDA atapfa kubasha inshingano z’akazi, ariko akagerageza kubasobanurira ko afite imbaraga n’ubuzima buhagaze neza n’ubwo ntacyo byatangaga. Ahamya ndetse ko hari umukoresha wamweruriye ko bazatakaza abakiriya nibimenyekana ko umwe mu bakozi babo yanduye SIDA, bigatuma yimwa akazi.

Igihe cyaje kugera Gasamagera ahura na Dr Anita Asiimwe wari Umunyamabanga Nshingwabikorwa w’ikicyo cyo kurwanya SIDA (CNLS), icyo gihe akavuga ko aribwo yongeye kumva yiruhukije, kuko yashishikarijwe kugaragaza umushinga w’ishyirahamwe ryakorera ubuvugizi abafite ubwandu bwa SIDA.

Asobanura ko yabwiwe ko ari umunyamahirwe kandi akaba ari umunyabwenge, kuburyo ubumenyi afite bwatuma ahindura ubuzima n’imibereho bya benshi. Ubwo nibwo haje gushingwa umuryango witwa Kigali Hope Association anabereye umuyobozi kugeza ubu, ukaba ari umuryango ukorera ubuvugizi urubyiruko rubana n’ubwandu bwa SIDA, ukanafasha urwo rubyiruko kwigirira icyizere no guharanira kwigira.

JPEG - 83.1 kb

Aha Claire Gasamagera yari kumwe n’umwe mu bayobozi bo muri Mali bafite kurwanya SIDA mu nshingano zabo

Mu mwaka wa 2012, Claire Gasamagera yaje kujya kuba muri Amerika, muri Leta ya Michigan, imwe mu zigize Leta Zunze Ubumwe za Amerika. Kugeza ubu, yamaze gushyirwa ku rutonde rw’abantu 100 baba muri Leta Zunze Ubumwe za Amerika, bamaze igihe kirekire babana n’ubwandu bw’agakoko gatera SIDA, ndetse yanatumiwe kuzahura na Perezida Barack Obama n’abagize Inteko Ishinga amategeko ya Leta Zunze Ubumwe za Amerika, bakaganira byimbitse ku bijyanye n’amategeko ajyanye no kurwanya SIDA no kurengera ababana n’ubu bwandu, dore ko asanzwe aba no mu kanama gashinzwe kurwanya SIDA muri Leta ya Michigan.

Claire Gasamagera amaze kugera mu bihugu byinshi ku isi, aho agenda atanga umusanzu we mu kurwanya icyorezo cya SIDA. Guhera tariki 14 kugeza kuri iki Cyumweru tariki 18 yari muri Hollywood aho we n’abantu batandukanye bagiranye amahugurwa agamije gushaka ingamba zo kurwanya iki cyorezo, no kurwanya akato gakorerwa abanduye kimwe no guheranwa n’ubwigunge.

KANDA HANO UREBE VIDEOS UTASANGA AHANDI