Dr Agnes Binagwaho yagiye muri Amerika mu nyigo y’umushinga ukomeye

Chief Editor | 4-10-2016
Dr Agnes Binagwaho yagiye muri Amerika mu nyigo y’umushinga ukomeye

Guhera kuwa Gatandatu tariki 1 Ukwakira 2016, Dr Agnes Binagwaho wahoze ari Minisitiri w’Ubuzima mu Rwanda, arimo kubarizwa i Boston muri Leta Zunze Ubumwe za Amerika, aho yagiye kwigira hamwe na bagenzi be bo muri Kaminuza ya Havard ibijyanye n’ishuri ry’ubuvuzi rizatangira muri 2018.

Nyuma yo kuvanwa muri Minisiteri y’Ubuzima muri Nyakanga uyu mwaka, Dr Agnes Binagwaho yahise akomeza n’ubundi mu bikorwa bifitanye isano n’ubuvuzi. Yahise atangira kwigisha muri Kaminuza yitwa "UGHE” (University of Global Health Equity), iyi ikaba iherereye i Rwinkwavu mu karere ka Kayonza.

Iyi Kaminuza ya "UGHE” irimo gutegura umushinga w’ishuri ry’ubuvuzi rikomeye rizatangira mu mwaka wa 2018, Dr Agnes Binagwaho akaba ari umwe mu nzobere zirimo gutegura no kunoza neza uwo mushinga, iki gikorwa kikaba kirimo kubera i Boston.

Aha i Boston muri Leta Zunze Ubumwe za Amerika, Dr Agnes Binagwaho yahahuriye na bagenzi be b’abarimu muri Kaminuza ikomeye yo muri Amerika yitwa Havard. Avuga ko iri tsinda ari ikipe ikomeye y’inzobere, izatanga amahirwe ahambaye mu kugeza ubuvuzi kuri bose.

KANDA HANO UREBE VIDEOS UTASANGA AHANDI