Gasasira Gaspard wakoreraga CNLG yapfuye urupfu rw’amayobera yitegura kujya ku kazi

Chief Editor | 7-09-2016
Gasasira Gaspard wakoreraga CNLG yapfuye urupfu rw’amayobera yitegura kujya ku kazi

Gasasira Gaspard wakoreraga Komisiyo y’Igihugu ishinzwe kurwanya Jenoside (CNLG) yapfuye mu masaya ya mugitondo cyo kuri uyu wa Gatatu tariki 7 Nzeri 2016, iby’urupfu rwe bikaba bikiri amayobera kuko yapfuye mu gihe yiteguraga kujya ku kazi.

Nk’uko byemezwa n’abo mu muryango we, Gasasira Gaspard, yabyutse mu masaha ya mugitondo agiye kwitegura kujya ku kazi, aza kwicara iwe mu rugo bigaragara ko afite intege nkeya, mukanya gato umukozi wo mu rugo amusanga aho yari yicaye abona atagihumeka.

Dr Bideri Diogène bakoranaga muri CNLG, yatangarije ikinyamakuru Ukwezi.com ko kuri uyu wa Kabiri Gasasira Gaspard yagiye ku kazi nk’ibisanzwe, ndetse ngo mu bigaragarira amaso nta kibazo cy’uburwayi cyangwa ikindi kitagenda babonaga afite, nawe avuga ko babikiwe n’umuryango we bakagwa mu kantu.

Nyuma y’uru rupfu rutunguranye, umurambo wa Gasasira Gaspard wajyanywe mu bitaro byitiriwe umwami Faycal biherereye ku Kacyiru mu mujyi wa Kigali, kugirango ukorerwe isuzuma.

Gasasira Gaspard yari umukozi wa CNLG ushinzwe gushyira inzibutso za Jenoside mu murage w’isi, ariko yabanje no gukora ibijyanye n’itangazamakuru muri iyi Komisiyo. Yanabaye umunyamakuru, akaba yarandikiye Imvaho Nshya na Kinyamateka.

KANDA HANO UREBE VIDEOS UTASANGA AHANDI