Gicumbi: Yiyahuye asiga yandikiye uwo bari bagiye gukora ubukwe ko yamwanduje SIDA

Chief Editor | 10-10-2016
Gicumbi: Yiyahuye asiga yandikiye uwo bari bagiye gukora ubukwe ko yamwanduje SIDA

Umugore w’imyaka 21 y’amavuko wo mu murenge wa Byumba mu karere ka Gicumbi yimanitse akoresheje umwenda we, asiga abwiye umugabo babanaga ndetse bateganyaga gukora ubukwe ko yanduye SIDA, anamusaba imbabazi n’umuryango we wose kuba yarahemutse akamwanduza SIDA.

Uyu nyakwigendera yabanaga n’umugabo we mu mudugudu wa Nyiragasuruba mu kagari ka Nyamabuye mu murenge wa Byumba, aho bari bamaze amezi atanu babana mu buryo butemewe n’amategeko ariko barimo gupanga gukora ubukwe vuba, ndetse bari baramaze kugura inzu bazabanamo nk’uko abaturage baturanye n’uyu muryango babitangarije ikinyamakuru Ukwezi.com.

Cyprien Nzirorera, umukuru w’umudugudu wa Nyiragasuruba, yatangarije ikinyamakuru Ukwezi.com ko nyakwigendera yasigaye mu rugo mu gitondo cyo kuri uyu wa Mbere tariki 10 Ukwakira 2016 hanyuma umugabo we akajya ku kazi, yataha agasanga yimanitse yashizemo umwuka.

Uyu muyobozi akomeza avuga ko basanze yandikiye umugabo babanaga amumenyesha ko abana n’ubwandu bw’agakoko gatera SIDA, aboneraho kumusaba imbabazi no gusaba imbabazi umuryango we wose. Avuga ko bari babanye neza ndetse bari bamaze no gutera imbere, bariguriye inzu bateganya no gukora ubukwe vuba.

KANDA HANO UREBE VIDEOS UTASANGA AHANDI