Gitwe: Abageni bakoze ubukwe bw’akataraboneka bigendera mu ngorofani - Amafoto

Chief Editor | 2-10-2016
Gitwe: Abageni bakoze ubukwe bw’akataraboneka bigendera mu ngorofani - Amafoto

Kuri iki Cyumweru tariki 2 Ukwakira 2016, i Gitwe mu karere ka Ruhango habaye ubukwe budasanzwe, aho umwarimu wo muri Kaminuza n’umukunzi we basezeranye, aho kugenda mu modoka z’igiciro gihambaye bakigendera mu ngorofani.

Munyaneza Emile asanzwe ari umwarimu muri Kaminuza ya Gitwe, ariko by’umwihariko akaba azwiho kugira udushya twinshi mu buzima bwe. Kuri iki Cyumweru, nibwo yasezeranye imbere y’Imana na Murekatete Josiane, umukunzi we bari bamaze igihe basezeranye imbere y’amategeko, ndetse yari yaramaze no kumusaba no kumukwa.

Ubukwe bwa Emile na Josiane, bwari bwuzuyemo udushya twinshi ariko icyatangaje abantu ni uko abageni batagenze mu modoka zihenze, ahubwo bigendeye mu ngorofani abantu bazirika ku modoka zitwara imizigo. Udushya dutandukanye twari muri ubu bukwe, twahuruje imbaga y’abantu benshi bashakaga kwihera ijisho.

JPEG - 247.2 kb
JPEG - 293.5 kb

Abageni bigendeye mu ngorofani aho kugenda mu modoka zihenze

Munyaneza Emile ni umunyarwenya ariko kandi anafite amateka yabera benshi isomo rikomeye mu buzima bwabo. Urugero rufatika, ni ukuba mu mwaka wa 2010 yaragiye kwiga mu Buhinde abikesha amafaranga yakoreye acuruza Me2U (Mituyu), ubu akaba yararangije icyiciro cya gatatu cya Kaminuza ndetse yahise abona n’akazi ko kwigisha muri Kaminuza ya Gitwe.

Ubukwe budasanzwe na Murekatete Josiane, yabukoze nyuma y’uko muri Nyakanga hari habaye imihango yo gusaba no gukwa ndetse no gusezerana imbere y’amategeko. Aba bageni kandi bari barambanye, dore ko bari bamaze imyaka igera ku 8 bakundana.

Aha bari mu mihango yo gusaba no gukwa

Bamaze igihe banasezeranye imbere y’amategeko

KANDA HANO UREBE VIDEOS UTASANGA AHANDI