Huye: Abantu 50 baguwe nabi n’inyama bariye bajya mu bitaro, umwe yamaze gupfa

Chief Editor | 14-09-2016
Huye: Abantu 50 baguwe nabi n’inyama bariye bajya mu bitaro, umwe yamaze gupfa

Kuri uyu wa Kabiri tariki 13 Nzeri 2016, abaturage benshi bo mu murenge wa Mbazi mu karere ka Huye bajyanywe mu bitaro bya Kaminuza bya Butare bizwi nka CHUB ndetse no mu bitaro bya Kabutare, nyuma y’uko inyama bari bariye zabaguye nabi, ndetse umwe yapfuye ataragezwa kwa muganga.

Hari amakuru agera ku kinyamakuru Ukwezi.com dukesha abatuye mu murenge wa Mbazi avuga ko hari abantu batatu baba bamaze kwicwa n’ingaruka z’inyama bariye, gusa inzego zitandukanye zikaba zitemeza iyi mibare.

Dr Sendegeya Augustin uyobora ibitaro bya CHUB, yatangarije ikinyamakuru Ukwezi.com ko abo baturage baguwe nabi n’inyama z’inka yari yipfushije, mu bitaro ayobora hakaba haragejejwe abarwayi 29 ariko bamwe bakaba baravuwe bagataha, kandi ngo mu bahageze nta n’umwe wigeze upfa.

JPEG - 128.8 kb

Dr Sendegeya uyobora CHUB, avuga ko ibitaro ayobora byakiriye abantu 29

Yemeza ariko ko hari umuntu umwe yamenye ko yapfuye mu baguwe nabi n’izi nyama z’inka yari yipfushije, gusa uwo akaba yarashizemo umwuka ataragezwa kwa muganga. Dr Theoneste uyobora ibitaro bya Kabutare, we yatangarije ikinyamakuru Ukwezi.com ko abajyanywe mu bitaro abereye umuyobozi bari 18, aba bose nabo ngo nta n’umwe wapfuye.

CIP AndrĂ© Hakizimana, umuvugizi wa Polisi y’u Rwanda mu Ntara y’Amajyepfo, yasobanuriye ikinyamakuru Ukwezi.com ko atari inka gusa yipfushije, ahubwo ngo ni inka, ihene n’ingurube byose by’umuturage umwe, byipfushije hanyuma abaturage barabirya.

Avuga ariko ko igiteye urujijo, ariko mu bantu 50 bagize ikibazo ndetse umwe agapfa, hatarimo umuryango wari nyiri ayo matungo, kuko bo ngo ntacyo babaye kandi barariye kuri izo nyama. Ashimangira ko hari n’abandi baziriyeho batagize ikibazo, bityo hakaba hakenewe ibizamini bya muganga ngo bemeze niba koko abagize ikibazo baragitewe n’izo nyama.

KANDA HANO UREBE VIDEOS UTASANGA AHANDI