AMAKURU

UKWEZI
CHENO

Ibibazo 4 by’ingutu bitegereje Minisitiri uzasimbura Dr Agnes Binagwaho

Ibibazo 4 by’ingutu bitegereje Minisitiri uzasimbura Dr Agnes Binagwaho
14-08-2016 | By Chief Editor | Yasomwe n'abantu 8685 | Ibitekerezo 4

Hashize igihe gisaga ukwezi, Minisiteri y’Ubuzima itarahabwa uyiyobora, nyuma y’uko Dr Agnes Binagwaho akuwe ku mwanya wa Minisitiri. N’ubwo hataraboneka umusimbura, uzaza amusimbura hari ibibazo byinshi by’ingutu azaba agomba guhangana nabyo.

Mu gihe hazabaho ihererekanyabubasha hagati ya Dr Agnes Binagwaho n’uzaba amusimbuye, ntawabura kuvuga ko hazaba habayeho n’ihererekanyabibazo, kuko Minisiteri y’Ubuzima irimo iby’ingutu bigomba gushakirwa umuti. Muri iyi nkuru, turabagezaho urutonde rw’ibibazo bine by’ingutu Minisitiri mushya azaba agomba guhangana nabyo.

1. Inyerezwa ry’amafaranga mu bitaro

Muri Gicurasi uyu mwaka, hari abayobozi b’ibitaro batawe muri yombi barimo abahoze bayobora cyangwa bakiyobora ibitaro, abacungamari, abashinzwe abakozi n’abagenzuzi, bafunzwe bakekwaho kunyereza no gukoresha nabi agera kuri miliyoni 800 z’amafanga y’u Rwanda.

Hari amakuru agera ku kinyamakuru Ukwezi.com avuga ko n’ubwo hatawe muri yombi abayobozi b’ibitaro, nyuma hari abayobozi bakuru muri Minisiteri y’ubuzima byagaragaye ko bagize uruhare rugaragara muri iryo sesagurwa n’inyerezwa ry’amafaranga yagenewe ibikorwa rusange by’inyungu z’abaturage, by’umwihariko mu bijyanye n’ubuvuzi.

Ibi bisobanura neza ko uzasimbura Dr Agnes Binagwaho, azaza yiteguye guhangana n’ikibazo cy’abayobozi b’ibitaro bakoresha nabi cyangwa bakigwizaho umutungo wa Leta, kugirango nawe atazagayirwa ko mu gice cy’ubuzima hanyerejwe akayabo. Azaza agomba kandi gukurikirana akamenya uko iki kibazo gihagaze, kugirango amenye uko agenda agishakira umuti.

2. Ubwisungane mu kwivuza burimo ibibazo byinshi

N’ubwo iby’ubwisungane mu kwivuza (Mutuelle de santé) ari inshingano z’ikigo cy’igihugu cy’Ubwishingizi (RSSB), Minisiteri y’Ubuzima niyo ibazwa ibijyanye n’ikigero, ubwitabire n’imikorere y’ubwisungane mu kwivuza nka kimwe mu bigira uruhare mu ireme ry’ubuvuzi n’ubuzima bw’abanyarwanda. Dr Agnes Binagwaho akiri Minisitiri, ibibazo by’ubwisungane mu kwivuza biri mu byo yasabwe n’Abadepite kwisobanuraho ndetse arabigayirwa bikomeye, bitewe ahanini n’ubwitabire bwagiye bugabanuka, abantu bakitabira ku kigero cyo hasi ugereranyije na mbere.

Uzasimbira Dr Agnes Binagwaho ariko we bishobora kuzamubera ikibazo cy’ingorabahizi kurushaho, kuko muri uyu mwaka abantu benshi usanga bataka ko ibyiciro by’ubudehe bitabakwiye, kwibura mu cyiciro, kutabasha kugera aho babaruriwe bakangirwa kwishyurira aho bari n’ibindi bituma umubare munini utarabasha kubona ubwisungane mu kwivuza, n’abishyuye bakaba bataka ko batarahabwa amakarita yo kwivuza, ibi byose bikaba byazanatuma ubwitabire bujya ku kigero cyo hasi. Uzasimbura Dr Agnes Binagwaho, azaba agomba guhangana n’iki kibazo atajenjetse na gato.

3. Ikibazo icy’abaganga bacika ibitaro bya Leta

Mu gihe Dr Agnes Binagwaho yari akiri Minisitiri, yavuze ko hari ikibazo cy’abaganga banga gukorera ibitaro bya Leta bakajya gukorera ibyigenga aho babahemba amafaranga menshi. Kuba ibitaro bibura abaganga bahagije bo kunoza serivisi z’ubuvuzi, ni ikibazo cy’ingutu uzaza gusimbura Dr Binagwaho Agnes azaba agomba guhangana nacyo kandi akagishakira umuti, kuko ibura ry’abaganga bahagije ari ikibazo gituma ireme ry’ubuvuzi riba ku kigero kidashimishije.

4. Gukosora no kurusha uwo asimbuye

Dr Agnes Binagwaho yagiye agayirwa ibintu byinshi mu nshuro zose yatumiwe mu Nteko Ishinga Amategeko agahatwa ibibazo n’Abadepite. Kugura inzitiramibu zidafite ubuziranenge, kugura ibikoresho bikangirikira mu bubiko ibindi bikaza byararangije igihe, gufata ibyemezo atitaye ku byifuzo by’ababanga bigatuma bakora nabi n’ibindi nk’ibyo, ni urusobekerane rw’ibibazo by’ingutu uzamusimbura agomba kuzaza akosora, kuko nta kabuza imikorere ye izajya igereranywa kenshi n’iy’uwo azaba asimbuye.

Uyu Minisitiri mushya rero azaza agomba kurwana no kugirango amakosa yakozwe yirinde kuyagwamo kandi arusheho kunoza ibyari birimo ibibazo, hanyuma ariko n’ibyagendaga neza azaba agomba kubinoza kurushaho kugirango imikorere ye irusheho gushimwa.


Tanga Igitekerezo
Ibitekerezo 4
Brown Kuya 23-09-2016

Imana izibyose twebwe nkabantu nibyodutekereza ariko hakenewe ubushishozi!

Eric Kuya 15-09-2016

Noneho numiwe kubona ibitaro bikomeye nkibi byakabgayi ujyakwivuza ngo batanze number 15 gusa ngo ntawundi bakwakira ubuse biraganahe koko?

j d Kuya 4-09-2016

ndikumva ribizo muri ministeri yu buzi ma icyo navuga nuko bashaka usimbura uwariho kuko ibitaro bya prive nibyo biri konoza serevisi ndashira nyakubashwa perezi kubwitangebwe nokuba abo banyereje umutungo wareta kuba bashyikirijwe ubutabera ndizera ko bizakemuka tukongera tukabona serevisi noze

Ryarashembona Ovide Kuya 19-08-2016

Jye numva icyemezo Nyakubahwa yafashye cyo gutabara abanyarwanda agakuru uriya nmugore ku mirimo aricyo kwishimira cyane kuko yari yarigize indakoreka yivugisha indimi z’amahanga nk’aho atari umunyarwanda koko!!Mu bushishozi bwa Nyakubahwa Prezida wacu asanganywe ntibizacyire aho azaryozwe ariya mafranga yanyerejwe kuko ntacyo arusha uriya wayoboraga REMAn’abandi!

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA