Ibitaro bya Kabgayi bimaze icyumweru byaragwatirije umurambo kuko uwapfuye atishyuriwe

Chief Editor | 7-09-2016
Ibitaro bya Kabgayi bimaze icyumweru byaragwatirije umurambo kuko uwapfuye atishyuriwe

Umugabo witwa Munyaneza Samuel amaze icyumweru aguye mu bitaro bya Kabgayi biri mu karere ka Muhanga, ariko kugeza ubu umuryango we wimwe umurambo ngo ujye kuwushyingura bitewe n’uko hari amafaranga uyu muryango usabwa kwishyura ukaba warayabuze dore ko ari umuryango unafite ibyangombwa ko utishoboye. Uyu murambo warafatiriwe, ngo ntiwarekurwa aya mafaranga atishyuwe.

Munyaneza Samuel yageze mu bitaro bya Kabgayi tariki 24 Kanama 2016, yoherejwe n’ikigo nderabuzima cya Shyogwe. Ageze muri ibi bitaro, yahamaze icyumweru kimwe maze mu ijoro ryo kuwa Gatatu tariki 31 Kanama 2016 aza gushiramo umwuka, kuba yarapfuye nabyo umuryango we ukavuga ko byatewe no gusiragizwa n’ubuyobozi bw’umurenge wa Shyogwe.

Ubusanzwe uyu muryango utuye mu kagari ka Mbare mu murenge wa Shyogwe ho mu karere ka Muhanga mu Ntara y’Amajyepfo, ukaba ari umuryango utishoboye nk’uko byemezwa n’abayobozi b’inzego z’ibanze ndetse n’abaturage baganiriye n’ikinyamakuru Ukwezi.com.

Violette Nyiraminani, ni umugore wa nyakwigendera Munyaneza Samuel. Yatangarije ikinyamakuru Ukwezi.com ko umurambo w’umugabo we wafatiriwe mu bitaro bya Kabgayi ukaba uhamaze icyumweru barawubimye ngo ujye gushyingurwa, bakaba bamusaba kubanza akishyura amafaranga y’u Rwanda 154.400 ariko akaba atabasha kuyabona kuko basanzwe ari abakene, kandi na nyakwigendera akaba yari amaze igihe afite ubumuga kuburyo ntacyo yabashaga gukora cyabasha kubakenura. Uyu mugore ahamya ko ari we wakoreraga umuryango wabo w’abantu 8 hakiyongeraho no kwita kuri nyakwigendera wahoranaga uburwayi.

Nyiraminani Violette ariko, avuga ko icyamushenguye kurushaho, ari uko urupfu rw’umugabo we rwanatewe no kurangaranwa n’ubuyobozi, bigatuma n’abaganga batamwitaho. Avuga ko umuryango wabo washyizwe mu cyiciro cya kabiri cy’ubudehe kitabemerera kwishyurirwa na Leta ubwisungane mu kwivuza, ariko inzego z’ibanze zikaba zarabahaye icyemezo cy’uko batishoboye kugeza ubwo umurenge wabemereye ubufasha bwo kubona ubwisungane mu kwivuza ndetse amakarita yabo akaba yari yarakozwe ariko ntarangire, uyu nyakwigendera akajya mu bitaro adafite ubwisungane ndetse umugore akajya ahora ajya kureba ushinzwe imibereho myiza y’abaturage mu murenge wa Shyogwe ngo amufashe ayo makarita arangire babone uko bivuza, akamusiragiza kugeza ubwo Munyaneza Samuel apfuye hataraboneka ubwo bwisungane mu kwivuza.

Nyiraminani yabwiye ikinyamakuru Ukwezi.com ko nyuma y’urupfu rw’umugabo we, yagiye ku bitaro bya Kabgayi yitwaje amafaranga y’u Rwanda 10.000 akabasaba ngo abe ayatanze bamuhe umurambo w’umugabo we ajye kuwushyingura hanyuma asige abasinyiye ko andi azajya ayishyura buhoro buhoro bakamwangira, ariko ubu n’ayo 10.000 akaba atakiyafite kuko yagiye ayakoresha muri ibyo bibazo byakurikiye ibyago byo gupfusha umugabo we ntanamushyingure.

Twagerageje kuvugana n’ushinzwe umutungo mu bitaro bya Kabgayi ari nawe Nyiraminani avuga ko yahendahenze akamubera ibamba, ariko mu nshuro zose twagerageje kumuhamagara ku murongo wa telefone ntiyabashije kutwitaba, akaba yaje kutubwira ko ari mu ishuri atabasha kuboneka.

Habinshuti Vedaste, Umunyamabanga Nshingwabikorwa w’umurenge wa Shyogwe, yabwiye ikinyamakuru Ukwezi.com ko umurenge ntacyo ushobora gufasha uyu muryango mu bijyanye no kwishyura umwenda watumye umurambo ufatirwa n’ibitaro. Avuga ko ari mushya muri uyu murenge, kandi akaba yaraje asanga uyu murenge nta mafaranga na macye ufite ahubwo uri mu myenda.

KANDA HANO UREBE VIDEOS UTASANGA AHANDI