Ibitaro bya Kibungo birashinjwa uburangare no gutera umwana icyuma akavuka yapfuye

Chief Editor | 17-05-2016
Ibitaro bya Kibungo birashinjwa uburangare no gutera umwana icyuma akavuka yapfuye

Ibitaro bya Kibungo biherereye mu karere ka Ngoma mu Ntara y’Uburasirazuba, birashinjwa uburangare n’umuryango w’umwe mu babyeyi bahabyariye, akaza kubyara umwana upfuye kandi afite ibikomere mu mutwe, bagakeka ko yaba yaratewe icyuma n’ababyaje nyina.

Ku Cyumweru tariki 15 Gicurasi 2016, nibwo Uwayezu Gaudence ukomoka mu murenge wa Rukira mu karere ka Ngoma, yajyanywe mu bitaro bya Kibungo aho yari agiye kubyarira, afashwa n’abaforomo bo muri ibi bitaro ku mugoroba w’uwo munsi, ariko kuri uyu wa Mbere nibwo umuryango we wamenye ko umwana yavutse apfuye.

Iyi karito iriho igitambaro cy’umweru, niyo irimo umurambo w’uwo mwana. Photo: Etienne Mivumbi

Uyu muryango uvuga ko abaforomo bo muri ibi bitaro babanje kurangarana Uwayezu Gaudence ubwo yari ahageze abakeneyeho ubufasha bwihutirwa, ikirenze kuri ibyo bakaba badashira amakenga igikomere basanze ku murambo w’uwo mwana ku mutwe, bagakeka ko yaba yaratewe icyuma ubwo abaforomo babyazaga nyina. Uyu muryango uvuga ko mu gihe waba udasobanuriwe neza iby’urupfu rw’uyu mwana, wahita ugana inkiko zigakurikirana abakozi b’ibi bitaro.

Ikinyamakuru Ukwezi.com cyagerageje kuvugana na Dr Namanya William uyobora ibi bitaro bya Kibungo tumubaza icyo avuga kuri iki kibazo, ararahira avuga ko ntacyo ashobora kudutangariza tutamusanze aho akorera ngo tubiganireho.

KANDA HANO UREBE VIDEOS UTASANGA AHANDI