Indege 15 zitagira aba ’Pilote’ zigiye gutangira gukoreshwa mu Rwanda

Bikorimana Alexis | 12-08-2016
Indege 15 zitagira aba ’Pilote’ zigiye gutangira gukoreshwa mu Rwanda

Indege zigera kuri 15 zigiye gutangira gukoreshwa mu Rwanda hagamijwe kwihutisha serivisi z’ubuzima. Uyu mu shinga wo gukwirakwiza imiti aho ikenewe mu buryo bwihuta hakoreshejwe indege zitagira umupiloti zizwi nka drones, wakozwe ku bufatanye n’imishinga y’inzobere mu by’ubuvuzi n’ikoranabuhanga.

Nk’uko ikinyamakuru CNN kibivuga, vuba aha mu Rwanda haraba hari drones 15 zikwirakwiza imiti, ariko cyane cyane bakazahera mu gukwirakwiza amaraso aho akenewe hirya no hino mu gihugu.

Ibi bije nyuma yo kubona ko hari abapfa cyangwa bakagerwaho n’ingaruka zo kugezwaho imiti habayeho gukererwa. Izi drones biteganwa ko zizakora mu mpande zose z’igihugu aho bivugwa ko ikoreshwa ry’iri koranabuhanga rigiye gutabara amagara ya benshi.

Izi ndege zizajya ziyoborwa hakoreshejwe Ipad dore ko porogaramu yo kuziyobora ndetse n’ingendo zose biri muri porogaramu ya Ipad zizajya zifashishwa.

U Rwanda rugiye kuba igihugu cya mbere mu gukoresha ubu buryo bwa drones mu gukwirakwiza imiti, kandi izi ndege zigiye kuzanwa mu Rwanda nyuma yo kubona ko u Rwanda rufite ikirere cyiza.

Uyu mushinga wa Californian start-up Zipline ugomba kugeragerezwa mu Rwanda , maze mu gihe waba urufashije kugera ku ntego nta mbogamizi ba nyirawo bakabona gukwirakwiza izi drones no mu bindi bihugu.

KANDA HANO UREBE VIDEOS UTASANGA AHANDI