Kigali: Impanuka yahitanye umusore wari ufite ubukwe mu masaha macye

Chief Editor | 28-05-2016
Kigali: Impanuka yahitanye umusore wari ufite ubukwe mu masaha macye

Umusore witwa Nziruguru Alexis wari utuye mu mujyi wa Kigali, yakoreye impanuka i Kanombe ho mu karere ka Kicukiro mu mujyi wa Kigali bimuviramo urupfu, mu gihe yirukaga mu myiteguro y’ubukwe bwe yapfuye bubura amasaha macye ngo butahe.

Mu masaha ya mbere ya saa sita, kuri uyu wa Gatandatu tariki 28 Gicurasi 2016, nibwo i Kanombe mu mujyi wa Kigali habaye impanuka ya moto yagonganye n’ikamyo, uwari utwaye moto arakomereka byoroheje naho uwo yari atwaye we arapfa.

Aya makuru yemejwe na Sup Jean Marie Vianney Ndushabandi; umuvugizi w’ishami rya Polisi y’u Rwanda rishinzwe umutekano wo mu muhanda, mu kiganiro yagiranye n’ikinyamakuru Ukwezi.com akaba yavuze ko uyu musore wari utwawe kuri moto yajyanywe mu bitaro bya gisirikare i Kanombe ariko agahita apfa.

Abandi bari barimo bashyashyana bategura aho abageni bari kwiyakirira, babwirwa inkuru y’incamugongo

Andi makuru ikinyamakuru Ukwezi.com cyabashije kumenya, ni uko uyu musore wakoze impanuka mbere ya saa sita, yari afite ubukwe nyuma ya saa sita aho yari gusezerana imbere y’Imana n’umukunzi we, ndetse bari baramaze gukora imihango yo gusaba no gukwa ndetse no gusezerana imbere y’amategeko.

Uyu musore aha yari ari kumwe n’umukunzi we mu mihango yo gusezerana mu murenge

Mu izina ry’abasomyi n’abakunzi b’ikinyamakuru Ukwezi.com, twihanganishije umuryango, inshuti n’abavandimwe ba nyakwigendera ndetse n’uyu mukunzi we wasigaye mu gahinda.

KANDA HANO UREBE VIDEOS UTASANGA AHANDI