Kigali: Nyuma y’uko ubukwe bupfuye, rurambikanye ngo hagaruzwe inkwano

Chief Editor | 9-08-2016
Kigali: Nyuma y’uko ubukwe bupfuye, rurambikanye ngo hagaruzwe inkwano

Kuwa Gatandatu tariki 6 Kanama 2016, nibwo twabagejejeho inkuru y’ubukwe bwapfuye ku munota wa nyuma, aho Rutayisire Béatrice na Gashugi Alphonse bagombaga gukora ubukwe kuri uwo munsi ariko bikananirana ku bwo kutumvikana ku mitungo, none ubu rurambikanye aho umusore avuga ko ashaka kugana inkiko ngo asubizwe impano.

Gashugi Alphonse yari yatangarije ikinyamakuru Ukwezi.com ko ubukwe bwapfuye bitewe n’uko bananiwe kumvikana ku bijyanye n’imitungo, bigatuma kuwa Kane badasezerana mu murenge nk’uko byari biteganyijwe. Bageze mu murenge bumvikana ibindi byose, ariko bigeze ku bijyanye n’imitungo umusore ashaka ko basezerana ivangamutungo muhahano naho umukobwa ashaka ivangamutungo rusange, buri umwe aguma ku izima kugeza ubwo ubukwe bupfuye.

Ubu ni ubutumire bw’ubukwe bwa Gashugi na Rutayisire bwagombaga kuba bwarabaye kuwa Gatandatu

Nyuma y’uko ubu bukwe bupfuye, hari amakuru yizewe ikinyamakuru Ukwezi.com gikesha umuntu wo hafi y’umuryango w’umukobwa, ashimangira ko ubu Gashugi Alphonse arimo kwishyuza amafaranga y’inkwano yari yarahaye umuryango w’umukobwa, abandi nabo bakaba bakomeje kumuringana cyane ko imyiteguro y’ubukwe yari yarabatwaye menshi.

Ibi byatumye tugirana ikiganiro na Gashugi Alphonse, adutangariza ko koko arimo gusaba umuryango wa Rutayisire Béatrice wari ugiye kumubera umugore ko bamusubiza inkwano yatanze, kandi nibitinda akaba yiteguye kugana inkiko zikamurenganura.

Bari bamaze imyaka 3 bakundana, aha Gashugi yufurizaga umukunzi we umwaka mushya muhire wa 2016/ Photo: Facebook

Avuga ko mbere yari yarumvikanye n’umukobwa ko azakwa amafaranga y’u Rwanda 500.000 ndetse akanayaha umuryango we, nyuma umukobwa akaza kubwira umuhungu ko ari macye akwiye kubongera 200.000 nawe akemera akayatanga kuko yamukundaga nk’uko abyivugira. Ubu ariko arashaka ko yayasubizwa uko yakabaye kuko nta mukobwa wabo yarongoye, n’ubwo avuga ko umuryango w’umukobwa watereye agati mu ryinyo ukaba ntacyo umusubiza ndetse akaba yumva amakuru y’uko bavuga ngo nta mafaranga y’inkwano yabahaye.

Mu gihe iki Cyumweru cyarenga atarayahabwa, ngo nta kabuza yahita ajya mu nkiko akarega uyu muryango ukamusubiza inkwano kuko ateganya gutumira abantu bose bari baramutwerereye agasangira nabo akanababarira inkuru y’urwo yabonye.

Ikinyamakuru Ukwezi.com cyagerageje kuvugana na Rutayisire Béatrice ngo twumve icyo avuga kuri iki kibazo, ariko ubwo twamuvugishaga ku murongo wa telefone, yanze gusubiza kuva ubwo telefone ihita iva ku murongo.

Rutayisire Aimable, ni se w’uyu mukobwa Rutayisire Béatrice. Yabwiye ikinyamakuru Ukwezi.com ko Gashugi Alphonse ari we wiyiciye ubukwe ubwo yangaga gusezerana n’umukobwa ivangamutungo, kandi gupfa k’ubukwe bikaba byaramuteye igihombo kinini kubera amafaranga yakoreshejwe mu myiteguro, icyakoze ahakana iby’uko yaba yaranze gusubiza umusore inkwano, akavuga ko bagomba kuzicara bakabyumvikanaho namara guhuguka.

KANDA HANO UREBE VIDEOS UTASANGA AHANDI