Kigali: Ubukwe bwapfuye ku munota wa nyuma n’inkwano yaramaze gutangwa

Chief Editor | 6-08-2016
Kigali: Ubukwe bwapfuye ku munota wa nyuma n’inkwano yaramaze gutangwa

Kuri uyu wa Gatandatu tariki 6 Kanama 2016, nibwo Rutayisire Béatrice na Gashugi Alphonse bagombaga gusezerana imbere y’Imana muri Paruwasi ya Kicukiro, ndetse bakiyakirira mu cyumba cya Kaminuza y’u Rwanda, ahahoze hitwa muri SFB, ariko ubukwe bwapfuye ku munota wa nyuma bitewe n’uko abageni bananiwe kumvikana ku mitungo.

Kuba umukobwa yarifuzaga gusezerana n’umusore ivangamutungo rusange naho umusore we yarashakaga ko bazavanga umuntungu bazashakana babana, nibyo byabaye intandaro yo gupfa k’ubu bukwe ku munota wa nyuma.

Ubwo ikinyamakuru Ukwezi.com cyamenyaga iby’iyi nkuru, cyaganiriye na Gashugi Alphonse, adutangariza ko kuwa Mbere w’iki cyumweru yajyanye n’umukunzi we ku biro by’umurenge hamwe n’abahamya bagombaga kubasinyira mu gitabo cy’irangamimirere, bakuzuza ibisabwa byose ariko byagera ku bijyanye n’imitungo umusore agashaka ko basezerana ivangamutungo muhahano naho umukobwa ashaka ivangamutungo rusange, kuva ubwo kutumvikana bikaba biratangiye.

Abageni bari bamaze igihe basohoye impapuro z’ubutumire, ndetse banahamagarira abantu kuzirikana itariki y’ubukwe bwabo

Akomeza avuga ko kuva ubwo imiryango yateranye bagashaka uko babicoca ngo buzuze ibisabwa basezerane ariko bikananirana kuko umukobwa yanze kuva ku izima ashaka ko bavanga umutungo, kugeza aho bananiranywe burundu itariki y’ubukwe igera ntawe ucyumvikana n’undi ubukwe buba burapfubye.

Ku ruhande rwe, Gashugi Alphonse avuga ko yari amaze imyaka itatu akundana na Rutayisire Béatrice, kandi uyu mukobwa akaba yari asanzwe azi ko umusore afite umwana yabyaye mbere bityo akaba yumva agomba kugira imitungo yegurira umwana we ubundi uwo bazashakana bakazafatanya imitungo bazaba bafatanyije no gushaka.

Avuga kandi ko nta gahunda afite yo kuba basubukura ubukwe, n’ubwo inkwano yari amaze ibyumweru bitatu yarayigejeje mu muryango wari ugiye kumubera kwa sebukwe. Ashimangira ko hari abantu bo mu muryango we bari baje mu Rwanda bavuye hanze baje gutaha ubukwe bakaba basubiyeho, akaba atakongera kubahamagara ngo bagaruke.

Ikinyamakuru Ukwezi.com cyagerageje kuvugana na Rutayisire Béatrice ku murongo wa telefone ariko inshuro zose twamuhamagaye ntiyitabye.

KANDA HANO UREBE VIDEOS UTASANGA AHANDI