Kigali: Umukozi wo mu rugo yanize umwana we yanze gupfa amutera icyuma aramwica

Chief Editor | 13-08-2016
Kigali: Umukozi wo mu rugo yanize umwana we yanze gupfa amutera icyuma aramwica

Mu murenge wa Gisozi mu karere ka Gasabo ko mu mujyi wa Kigali, umukozi wo mu rugo yabyaye umwana ahita amuniga ashaka kumwica abonye adashizemo umwuka amutera icyuma aramwica, ubu akaba yatawe muri yombi na Polisi y’u Rwanda.

Nk’uko byemejwe na Sup Hitayezu Emmanuel, umuvugizi wa Polisi y’u Rwanda mu mujyi wa Kigali, mu kiganiro n’ikinyamakuru Ukwezi.com yavuze ko uyu mukobwa wakoraga akazi ko mu rugo mu kagari ka Musezero mu murenge wa Gisozi, yabyaye umwana kuri uyu wa Gatanu hanyuma akamwica mu masaha ya kumanywa.

Uyu muvugizi wa Polisi avuga ko uwo mukobwa w’imyaka 22 y’amavuko akimara kubyara umwana we, yagerageje kumwica amunize ariko akabona ntabwo ashizemo umwuka, niko gufata icyuma arakimutera ku ijosi aramwica.

Ubu uyu mukobwa wihekuye ndetse akaba abyemera akavuga ko yabitewe n’uko yabuze umusore wamuteye inda, yatawe muri yombi na Polisi y’u Rwanda imucumbikiye mu gihe bitegerejwe ko ashyikirizwa ubushinjacyaha.

KANDA HANO UREBE VIDEOS UTASANGA AHANDI